PDEA dugangan og mga ahente

CEBU, Philippines — Madugangan ang pwersa sa Philippine Drug Enforcement Agency-7 karong tuiga.

Ang tigpamaba sa PDEA-7, Leia Albiar, nibutyag nga mosaka ngadto sa 100 ka ahente ang ilang ahensya nga maoy mo-operate sa tibuok rehiyon 7.

Samtang ang regional director sa ahensya, Atty. Emerson Margate, nipadayag nga sa pagsulod sa 2018, mas hingusgan pa ang kampanya batok sa drugas ilabi na ngadto sa mga dagkong negosyante niini.

“It remains a priority of the agency to strengthen inter-agency coordination for streamlined and more effective programs and operations, particularly the conduct of high-impact operations, the arrest of high-value targets, and the implementation of the Barangay Drug-Clearing Program,” matud ni Margate.

Nasayran nga aduna ray 49 ka Drug Enforcement Officers ug 36 kabuok ang anaa sa admin sa maong ahensya.

Plano ni Margate nga mas padaghanon pa ang dawaton nga mga aplikante sa pagka-ahente aron mapaspasan ang paggukod sa mga nahabiling durugista sa Central Visayas.

Matud ni Albiar nga hayan maanam-anam na og tuman ang mga plano ni Margate nga makatukod og mga opisina sa mga probinsiya sa rehiyon.

“Ang plano sa agency nga puhon naa nay PDEA offices kada lungsod. Sa pagkakaron, naa tay offices sa Bohol, Negros Oriental, ug ang regional office nga naa sa Cebu City. Ang provincial office sa Siquijor posible sa 2018 (matukod), usa na sa priority ni Dir. Emerson Margate,” si Albiar miingon.

Nasayran nga naglisud ang maong ahensya sa kampanya batok ilegal nga drugas gumikan sa ka gamay ra sa ilang sakop. (BANAT NEWS)