Chinese tourists gitulis

CEBU, Philippines – Upat ka mga turistang Chinese nationals ug ang ilang Pilipino nga drayber ang gitulis sa duha ka tulisan sulod sa ilang gisakyan nga van samtang paingon unta sa Malapascua Island pag-abot sa national highway sa Brgy. Curva sa lungsod sa Medellin.

Giila ang mga biktima nga sila si Jerome Enriquez, 23, drayber sa Grandia Van nga iya sa Malapascua Beach Resort, iyang sakay nga mga turista nga sila si Danni Yu, 33, Peijing Zhuang, 36, Jue Zhang, 33 ug Xu Wu, 32.

Matud pa ni Senior Police Officer 1 Ryan Castro sa Medellin Police nga nahinabi sa Banat News gikan gitagbo sa airport ang maong mga Chinese nationals nga paingon sa isla sa Malapascua.

Apan pag-abot sa mingaw nga dapit sa maong lugar kalit lang mi-overtake sa ilang van ang usa ka motorsiklo ug mibabag sa ilang dalan.

Duha ka mga lalaki ang sakay sa motorsiklo diin ang drayber nagsuot og ski mask  samtang ang back rider nagsuot og helmet nanaog ug misakay sa van nga armado og .45 caliber pistol. Si Castro miingon nga sa dihang mibabag ang motorsiklo sa van sulay pa unta kini nga gibanggaan sa drayber apan wala na sila nakalihok kay armado ang mga tulisan.

Sulod sa van gilimas sa tulisan ang mga mahalong gamit ug ang dala nga salapi sa mga biktima nga mikantidad og P150 mil ug pagkahuman daling misibat ang mga tulisan padung sa habagatan.

Nagduda si Castro nga gisundan nang daan gikan sa airport ang mga biktima ug pag-abot sa maong dapit didto na kini gitulis kay mingaw ang lugar kay tungatunga man sa plantasyon sa tubo. Matud pa ni Castro, karon pa nahitabo sa maong lungsod nga dunay mga langyaw nga sakay sa sakyanan ang gipara ug gitulis.

Apil sa gisubay sa kapulisan ang anggolo nga inside job diin apil nga ilang gisubay ang drayber sa van bisan pa man og apil kini sa gitulis.  – /EIM) (BANAT NEWS)