Hubog nagbugal-bugal sa polis sikop
CEBU, Philippines – Gidakop ang duha ka hubog nga lalaki nga nagbugal-bugal ug nanukmag pa sa mga sakop sa kapolisan nga namadlong sa ilang gihimo ang paghinubog atubangan sa usa ka restobar sa barangay Pitogo, Consolacion alas 4 pasado ang takna niadtong Sabado sa hapon.
Si SPO1 Francisco Perez Jr. sa Consolacion Police Station niila sa mga nadakpan nga sila si Cyril Solima Agan ug Dixon Roso Pasten, pulos hingkod ug taga barangay Casili sa maong lungsod.
Sila si PO3 Bryan Borinaga ug kaubanan nga luwan sa patrol car ang nakakita ug nibadlong sa duha nga naglakaw sa dalan apan nasuko ang duha ug nagyawyaw.
“Kamo mga polis wala’y buot ug wala’y ayo,” sumala pa ni Borinaga base sa gisulti sa usa ka hubog kinsa nanukmag kaniya apan nakalikay.
Ang mga kauban ni Borinaga sa patrol car ang dali nga nidakop sa duha ug diha’ng ilang girekisa ilang nakuha sa ilang bulsa ang tagsa ka pakete sa shabu. Ang duha nga kasamtangang gibalhug sa detention cell ang pasakaan og kasong direct assault ug paghupot sa ilegal nga drugas. – /GMR) (BANAT NEWS)
- Latest
