3,251 natala’ng kaso sa dengue sa Probinsiya sa Sugbo

CEBU, Philippines — Nakatala na og 3,251 ka kaso sa dengue ang Probinsiya sa Sugbo hangtud niining buwana apan matud sa health officials nga nikunhod ang gidaghanon sa kaso sa dengue sulod sa niaging duha ka semana.

Matud ni Dr. Miguel Tristan Rebalde, health data analyst ug coordinator sa Cebu Provincial Health Office (PHO) nga 1,749 sa mga natala nga kaso mga lalaki samtang 1,502 mga babaye.

Gibutyag ni Rebalde nga nining buwana, 29 na ka bag-ong kaso ang natala sukad niadtong Septiyembre 1, 2026.

Apan ang pinakataas nga binuwan nga kaso sa dengue natala niadtong Agosto diin niabot kini ngadto sa 1,538 ka kaso.

Si Rebalde nagkanayon nga bisan pa sa gidaghanon sa mga kaso wala pa modeklara ang Cebu Province og dengue outbreak.

Lakip sa mga lugar nga adunay pinakataas nga na-report nga kaso gilangkuban sa mga siyudad sa Talisay ug Toledo, mga lungsod sa Medellin, Consolacion, Minglanilla, Cordova ug Dalaguete.

Matud uasb ni Rebalde nga nagpatuman ang probinsiya og larviciding aron matubag ang mga lugar diin mahimong pundoha sa mga lamok nga nagdala sa dengue.

Gipatuman usab ang active case investigation lakip ang contact tracing sa mga pamilya ug panimalay sa mga lugar nga adunay gikatahong dengue transmission.

Ug kong gikinahanglan magpatuman usab og misting sa mga panimalay o lugar nga gikatahong adunay dengue cases.

Samtang, si Dr. Nikki Catalan-Vizcayno, Capitol public health consultant nagkanayon nga namatikdan na ang pagkunhod sa kaso sa dengue sulod sa niaging duha ka semana.

Gitumbok usab ni Catalan ang papel sa Dengue Fast Lane sa 16 ka Capitol-run provincial ug district hospitals diin gihatagan og prayoridad ang mga pasyenteng adunay sintomas sa dengue alang sa assessment, laboratory testing ug tukmang pagtambal.

Matud ni Catalan nga ang sestema nakatabang sa sayong pag-detect sa mga kaso ilabina sa mga pasyenteng adunay hilanat ug rashes.

Sa laing bahin, unom ang natala nga namatay tungod sa dengue niadtong Agosto nga mao usab ang pinakataas nga death tally sa maong bulan gikan sa 1,538 ka kaso.

Si Rebalde nagkanayon nga gigamit usab kini sa pagtan-aw sa case fatality rate o kong unsa ka seryoso ang sakit base sa gidaghanon sa namatay.

Gipahinumduman ni Catalan ang publiko nga dili angay’ng mataranta tungod sa dengue cases apan importante ang sayong pagkonsulta sa health workers kong makasinati og mga sintomas.  BDB BANAT NEWS