Tungod sa selos, kapuyo naghikog

CEBU, Philippines - Naghikog patay ang usa ka construction worker human kini biyai sa iyang  kapuyo kinsa giselosan  niya  nga  may  laing  laki, didto sa ilang  balay  sa barangay Tungkop, lungsod sa Minglanilla kagahapon sa alas 7:15 sa buntag.

Ang napalgang patay  nga nagbitay mao si Roger Villeta, 22, ulitawo, construction worker ug  adunay kapuyo nga  si Chimby Labradilla, hingkod  usab  ug nagpuyo sila sa maong lugar.

Matud ni  PO1 Welmer Campo sa Minglanilla Police Station nga  segun  sa giasoy  kaniya  ni  Labradilla, nga sa wala pa maghikog  si  Villeta,  nagkalalis sila  nga  misangpot  sa away  kay nagselos kini kaniya  nga may  lain  siyang  laki. Maoy  hinungdan  nga  mibiya  siya   aron mahunong ang ilang lalis  apan  kapin  sa usa ka  oras, mibalik  dayon  siya  apan  mihinay  siya  pagsulod  sa ilang  balay.

Apan  nakurat  na lang  siya  kay  sa iyang  pag-abli  sa ilang  lawak maoy  misugat  sa iyang  panan-aw  nga  nagbitay  na  ug wala  nay  panimuot  si Villeta.

Busa  nagpakitabang  siya  sa iyang  mga silingan  ug  ila dayon  kining  gihatud  ngadto  sa Minglanilla District  Hospital diin  kini  ideklarar  nga  patay  na.

Ang  kapolisan  misugo  kaniya  nga  ipa-autopsy  ang  lawas  patay  ni Villeta  aron masuta  kun  wala bay  foul  play  ang kamatayon  sa  maong  construction worker. (/WC) (BANAT NEWS)