Livelihood assistance nadawat sa mga residente sa Lapu-Lapu City

Mokabat sa 96 ka kwalipikadong residente sa Lapu-Lapu City ang nakadawat og kinatibuk-ang P480,000 nga livelihood financial assistance gikan sa city government aron makasugod o makapalambo sa ilang gagmay’ng panginabuhian.

Tag-P5,000 ang nadawat sa matag benepisyaryo ubos sa Sustainable Livelihood Assistance Program sa City Social Welfare and Development Office (CSWDO).

Gitumong ang ayuda sa pagtabang sa mga residente nga makasugod o makapalig-on sa micro-enterprises ug makadugang sa ilang kapasidad sa pagpanginabuhi.

Ang pinakabag-ong batch sa mga benepisyaryo naggikan sa 14 ka barangay sa mainland ug island sectors sa Lapu-Lapu City.

Giapod-apod ang livelihood assistance niadtong Biyernes, Septiyembre 11, pinaagi sa CSWDO.

Ang Barangay Pusok ang adunay pinakadaghang benepisyaryo nga mikabat og 23 ka residente.

Gisundan kini sa Bankal ug Basak nga adunay tag-14 ka benepisyaryo, samtang 12 ka residente gikan sa Maribago ang nakadawat usab sa livelihood grant.

Ang ubang barangay nga naapil mao ang Agus nga adunay pito ka benepisyaryo, Marigondon nga unom, Babag nga lima, Pajac nga upat, ug Ibo nga tulo.

Ang Buaya, Gun-ob ug Santa Rosa adunay tag-duha ka benepisyaryo, samtang tag-usa ang nakadawat gikan sa Looc ug Poblacion.

Matud ni Mayor Ma. Cynthia “Cindi” King-Chan, magpadayon ang Sustainable Livelihood Assistance Program aron mas daghang Oponganon ang makadawat og kapital alang sa ilang income-generating projects.

Ang mga residente nga gustong mo-apply sa umaabot nga assistance cycles kinahanglan mosumite og Certificate of Indigency, Barangay Residency, Voter’s Verification Certificate, government-issued ID, ug approved project proposal.

Kinahanglan isumite ang mga dokumento sa CSWDO Livelihood Unit sa Lapu-Lapu City Hall alang sa evaluation ug processing. Kristin de Dios/MEL