Listahan sa mga holidays sa tuig 2027 gipagawas sa Malacañang

CEBU, Philippines — Gipagawas na sa Malacañang ang listahan sa mga regular holiday ug special non-working days alang sa 2027, nga naghatag sa mga Pilipino og giya sa mga opisyal nga holiday sa nasud alang sa sunod nga tuig.

Ubos sa Proclamation No. 1427, nga gipirmahan niadtong Septiyembre 8, 2026, ang mga regular holiday naglakip sa New Year’s Day sa Enero 1, Maundy Thursday sa Marso 25, Good Friday sa Marso 26, Araw ng Kagitingan sa Abril 9, Labor Day sa Mayo 1, Independence Day sa Hunyo 12, National Heroes Day sa Agosto 30, Bonifacio Day sa Nobiyembre 30, Christmas Day sa Disyembre 25, ug Rizal Day sa Disyembre 30.

Gilista usab sa proklamasyon ang Ninoy Aquino Day sa Agosto 21, All Saints’ Day sa Nobiyembre 1, ang Feast of the Immaculate Conception of Mary sa Disyembre 8, ug ang Kataposang Adlaw sa Tuig sa Disyembre 31 isip mga regular special non-working day.

Gideklarar usab sa Malacañang ang upat ka dugang special non-working days: Chinese New Year sa Pebrero 6, Black Saturday sa Marso 27, All Souls’ Day sa Nobiyembre 2, ug Christmas Eve sa Disyembre 24.

Samtang, ang Pebrero 25, ang ika-41 nga anibersaryo sa EDSA People Power Revolution, obserbahan isip special working day.

Sumala sa proklamasyon, ang dugang non-working days gituyo aron hatagan ang mga pamilya og dugang panahon sa pagsaulog sa All Saints’ Day, All Souls’ Day, ug mga tradisyon sa Pasko, samtang makatabang usab sa pagpalambo sa lokal nga turismo.

Wala pa malakip sa listahan ang mga petsa alang sa Eid’l Fitr ug Eid’l Adha. Matud sa Malacañang, magpagawas og managlahing proklamasyon sa higayon nga matino na ang gibanabanang petsa niining mga holiday sa Islam, base sa Islamic o lunar calendar ug astronomical calculations.

Ang proklamasyon epektibo dayon, samtang ang Department of Labor and Employment (DOLE) gitahasan sa pagpagawas sa mga lagda alang sa pagpatuman niini. Gie-Ann N. Tapic/MEL

NACC nag-awhag sa mga pamilya nga mahimong foster parents

Nanawagan ang National Authority for Child Care - Regional Alternative Child Care Office (NACC RACCO) VII sa mga interesado nga indibidwal ug pamilya sa Central Visayas nga mahimong lisensyadong foster parents.

Matud ni NACC RACCO VII Officer-in-Charge Concepcion Solera sa usa ka pamahayag nga ang foster parents mao ang mga indibidwal nga lisensyado sa NACC aron mohatag og foster care o temporaryong pag-atiman isip ginikanan sa usa ka bata. Kini nga family-based care nagtumong sa pagsuporta sa kaayohan ug hustong paglambo sa mga batang nakasinati og lisod nga kahimtang.

Matud sa NACC, ang Foster Family Care License (FFCL) nga gihatag sa foster parents balido sulod sa tulo ka tuig, mahimong i-renew, ug dili mahimong ibalhin ngadto sa laing tawo.

Ang matag pamilya mahimong mag-atiman og labing taas tulo ka mga bata, o usa ka bata nga adunay espesyal nga panginahanglan. Aduna usab government subsidy aron makatabang sa pag-atiman sa mga foster children.

Sa Region 7, adunay 58 ka lisensyadong foster parents ug 74 ka mga bata nga anaa ubos sa foster care.

Kini nga mga bata, nga gibiyaan, napasagdan o gitugyan sa ilang mga pamilya, naghulat nga ma-reunite sa ilang biological families, ma-adopt, o maandam alang sa independent living kung hapit na sila moabot sa hustong edad.

Ang NACC usa ka quasi-judicial agency nga gilakip sa Department of Social Welfare and Development (DSWD), nga gimugna ubos sa Republic Act No. 11642, o ang Domestic Administrative Adoption and Alternative Child Care Act. — /MEL (FREEMAN)