Mga magtutudlo og ginikanan tudloan pagbantay sa mga tinun-an

Gipalig-on sa Substance Abuse and Mental Health Services Office (SAMHSO) ang ilang advocacy efforts pinaagi sa mga orientation sa mga barangay ug eskwelahan.

Matud ni SAMHSO head Niño Krisbayani Dargantes nagplano usab ang opisina nga tudloan ang mga magtutudlo ug ginikanan sa pag-ila sa mga red flags sa ilang mga estudyante ug anak.

Ang maong inisyatibo misunod sa mga school safety activities ug assessments nga gihimo sa mga estudyante, diin nakita sa opisina ang panginahanglan nga mas maapil ang mga magtutudlo ug ginikanan sa pag-ila sa mga kabalaka nga mahimong manginahanglan og sayong intervention.

“Teachers and parents. Mao na ang among goal karon. Teachers and parents dapat makabantay jud sila,” matud ni Dargantes.

Matud niya, usahay ang mga pagbag-o sa pamatasan o attitude sa usa ka bata isipon lang nga normal, apan posible kini nga timailhan nga adunay problema nga giatubang ang bata.

Nakig-alayon na ang SAMHSO sa Department of Education (DepEd) isip kabahin sa ilang paningkamot nga palig-onon ang mga programa sa mga eskwelahan.

Nakapatuman na usab ang opisina og advocacy activities sa mga public ug private schools, samtang gipalapdan usab ang susamang kalihokan sa mga barangay.

Matud ni Dargantes, nakigsabot usab ang SAMHSO sa DepEd ug Parents-Teachers Association (PTA) kung unsaon pag-apil sa mga ginikanan sa maong mga kalihokan.

Ang mga estudyante nga mailhan nga nanginahanglan og dugang tabang mahimong i-refer sa SAMHSO alang sa assessment, matud ni Dargantes. Ang mga psychometrician sa opisina maoy mohimo sa assessment aron matino kung nanginahanglan ba ang estudyante og dugang nga intervention. Ang mga kaso nga nanginahanglan og specialized care mahimong i-refer sa psychologist o psychiatrist. Kristin De Dios/MEL