Pambato sa Star Cinema

CEBU, Philippines — Ang umaabot nga pelikula nila ni Donny Pangilinan ug Belle Mariano maoy unang movie sa Star Cinema nga ipasalida sa mga sinehan sukad sa pandemic. Ang maong wala pay titulo nga pelikula, gipahibawo sa maong movie outfit niadtong Miyerkoles pinaagi sa Instagram. Gi-share sab nila ni Donny ug Belle ang maong balita sa ilang isig ka IG account. Follow-up project kini sa Love Is Color Blind, nga maoy gideklara nga highest- grossing movie of 2021, ug No.1 film sa Netflix sa nilabay nga tuig. Kasamtangang makita ang magloveteam sa ilang toprating digital series He’s Into Her season 2 sa iWant TFC.

One month na…

Ang tsika, usa ka buwan na nga magkarelasyon ang Juliever o sila si Julie Ann San Jose ug Rayver Cruz. Busa gipaabot nga hapit na sila moangkon sa matuod nila nga relasyon, ilabi na nga kanunay silang sikit ug sweet sa ilang mga social media posts ingon man interactions online. Gani, may mga nitagna nga mas maunhan pa sa Juliever, pag-angkon sila si Ruru Madrid ug Bianca Umali, nga hagbay rang gidungog nga may relasyon, apan paduding pa gihapon hangtud karon.

Utro sab

Lain sab nga gituohang uyab na gyud sila si Miguel Tanfelix ug Ysabel Ortega kinsa nagkasuod og maayo sanglit co-stars sila sa Voltes V nga nauswag ang airing ngadto na sa sunod tuig sanglit daghan matud pa og angayang humanon sa maong series. Hinungdan nga sukdon una sa GMA7 ang chemistry sa loveteam sa duruha pinaagi sa What We Could Be TV series nga mulugwa na sa primetime sa August 15, hulip sa Hello, Stranger nila ni Gabbi Garcia ug Khalil Ramos.

Romcom goal

Plano ni Xian Lim nga makamugna og pelikula nga silang duha sa iyang hinigugma nga si Kim Chiu ang mga bida, ug syempre, siya maoy director. Suma pa niya, naistoryahan na nila kini ni Kim, diin sa gawas sa nasud ang ilang shooting puhon sa tukmang panahon. Ang istorya mao nga adto sila magkaila sa gawas sa nasud ug magkahigugmaay. Romantic-comedy unya kini. Pagkakaron, busy una si Xian sa umaabot nga pelikulang Hello, Universe, diin sila si Janno Gibbs, Benjie Paras, ug Anjo Yllana ang mga bida.

Naay future

Masaligon si direk Ted Boborol nga adunay ikabuga ug maayong kapaingnan ang mga loveteam nga gihulma sa Star Magic pinaagi sa pelikula nga Connected. Kini labi na kay puros sila mga produkto sa Pinoy Big Brother: Connect, ug nagkailhanay na og maayo intandi sa ubang loveteam nga dihang na artista na, usa pa lamang gipares. Ang mga nahisgutan mao sila Kobie Brown ug Andi Abaya (KoDrea), Ralph Malibunas ug Gail Banawis (RalphGail), ug Chico Alicaya ug Amanda Zamora (ChiManda). Si Boborol, kinsa director sab nila ni Joshua Garcia ug Julia Barretto, Ronnie Alonte ug Loisa Andalio ug Enrique Gil ug Liza Soberano kaniadto, niingon nga naningkamot gyud ang iyang mga artista ug nakita gyud niya ang ilang mga potensyal. Gisalida na ang Connected sugod niadtong July 22, pinaagi sa  KTX.ph ug Cinexpress.

Wow na Wow!

Hot, hot, hot, as in nagbaga ang ka sexy sa magtiayong Troy Montero, 44, ug Aubrey Miles, 40, sa ilang latest photos nga kuha sa photographer nga si Niko Gonzales, didto sa The Ranch sa Sto. Tomas, Batangas. Suma pa, prenup photos kini nila sa ilang civil wedding sa nilabay nga bulan apan niining bag-o lang gipagawas. Nag-aso ang maanindot nga comments sa ilang followers human gi-upload ni Aubrey kining maong mga hulagway sa iyang IG account. May miingon nga, “hottest married couple” sila si Troy ug Aubrey, kinsa 18 years nga nag-live in una pa nagpakasal. Katarungan nila, komportabli sila sa ilang pagbati sa usag-usa, hinungdan nga wala sila nagdali pagpakasal.