Gitalikdan nga pangandoy

CEBU, Philippines — “Music makes me feel at ease. When I sing, I make my own style and I always sing not just from the heart but also sing from the soul”, pagpabuhagay pa sa 25- anyos nga nahimong first runner-up sa Sinulog Idol Season 11 nga si Chreystle Mae Gealogo.

Maingon nga mao kini ang sekreto ni Chreystle aron nga magmalampuson sa pito ka gabii nga kompetisyon sa Sinulog Idol karong tuiga.

Giangkon ni Chreystle nga taud-taud na gyud siya nga nangandoy nga mahimong kabahin sa  maong kompetisyon.

“First year college pa gyud ko ganahan moapil but dili gyud ko makaapil kay daghan conflict sa skwelahan. Karon nga 25 nako, ako na gyud siya gi-push. Gituyo jud sa Ginoo nga mobalik ko og puyo diri Cebu because naa juy siya’y plano para nako”, suma pa niya.

Nagikan sa Surigao si Chreystle. Didto siya nagtubo ug dinhi na siya sa Dakbayan sa Sugbo mipadayon sa iyang pagtungha sa kolehiyo sa kurso nga BSBA-Financial Management sa University of San Carlos.

Paghuman niya sa iyang pagtungha, mibalik na siya didto sa iyang kabanay sa Surigao. Apan sa kapait sa kinabuhi nga ilang nasinati, gitug-an ni Chreystle nga nanginahanglan gyud sila og dako nga kantidad sa kwarta tungod sa krisis nga ilang giatubang. Dugang rason pa niya mao ang gusto niya nga makatabang niini sa iyang kaugalingon nga pamaagi.

 “Akong family kay naglisod sab gyud kay wala pa nahuman akong mga igsuon og eskwela tungod sa kalisud sa kinabuhi. Mao na naninguha sab gyud ko nga makatabang sa ilaha kay I don't want to ruin their dreams of finishing their college degree kay ganahan ko kami tanan ma-successful. I want them to be proud of themselves”, si Chreystle misaysay .

Dugang ni Chreystle nga bisan og anaa na siya sa Sugbo nanikaysikay isip usaka bank teller apan matud pa niya nga dili gyud kaigo ang iyang madawat nga sweldo matag kinsenas.

Mao nga napugos gyud siya og pagpangita pa og kwarta aron nga masolusyonan ang iyang mga problema nga giatubang ug aron nga makatabang sa panginahanglan sa iyang pamilya.

Ang  pag-ampo ang pasiunang lakang ni Chreystle aron nga masulbad ang iyang problema.

Sa dakong pagsalig ni Chreystle ngadto sa Kahitas-an,  nahimo kini nga tulay aron nga inanay niya nga makab-ot ang iyang mga pangandoy nga kausa niya nga gitalikdan.

Nagsugod isip solo performer si Chreystle sa edad nga 5 anyos pa lang ug sa dihang nag-eskwela na, nahimo na siya nga sakop sa usa ka performing arts group kaniadto. 

Matud pa ni Chreystle nga nagsilbi na kini nga formal trainings sanglit aduna man sab siya’y mga nakat-unan nga mga technique sa pagkanta.

“We had different trainings. From dancing, to acting, to singing in groups and solo. That training was for our international performance in Taiwan, I forgot the name sa event. I was with the band category, duet category, ug sa choral group category. We went their twice. The first time kay katong Grade 4 ko and second time kay 2nd year high school ko”, saysay pa ni Chreystle.

Pagtungtong niya sa  kolehiyo, hingpit na nga nawani niya ang pagkanta nga solo human nga nahimo siya nga membro sa University of San Carlos Choristers nga ubos sa pagdumala ni Maesto Obette del Rosario.

“Wala kaayo koy kaila dinhi sa Cebu mao naundang ang akong solo performances and akoang goal pag-college kay makahuman ko. But still, thankful gihapon ko nila ni Ian Mark ug ni Sir Obette kay nakakanta ko with a group nga mas lingaw,” niya pa.

Sa iyang pagsalmot sa maong choral group, dinhi sab niya nakaila ang iyang sunod nga grupo nga kasamtangan niya nga giapilan karon nga mao ang “The Basics Acapella” kun din bisan og bag-o pa lang kini nga napundok, nakaangkon na kini og mga dagko nga mga exposure human nga misalmot sa BPop Acapella Challenge niadtong tuig 2019. Gani, nahimo sab sila nga interpreter sa awit ni Frenyx Tarongoy nga “Sugbuanong Musika” sa bag-uhay lang nga natapos nga ika-40 nga Cebu Popular Music Festival”.

“Wala ko mag-expect sa mga blessings nga gihatag ni Lord sa akoa ug sa group kay we are neophytes sa industry and ang amoa lang gyud nga goal is to sing lang gyud, for fun lang”, siya miingon.

Dako ang pasalamat ni Chreystle nga nahimo siya nga kabahin sa The Basics Acapella gumikan kay mao sab kini ang mitabang sa iyang pagpangandam sa Sinulog Idol.

“Akong family and friends gyud ang nag-push nako nga moapil. And one big reason nganong niapil sab gyud ko is ganahan ko moperform. Kay through performing you can also improve where in daghan ka og makat-unan and sa Sinulog Idol kay daghan kaayo og workshops nga mao ang nagtabang namo to better in performing”, si Chreystle miingon.

Gusto sab nga pamatud-an  ni Chreystle nga bisan og taud-taud na siya nga mihunong isip solo performer,  aduna pa siya’y ikabuga . 

Dugang pa ni Chreystle nga gusto sab niya nga mahimo siya nga inspirasyon ngadto sa uban nga dili gihapon angay nga kalimtan ang nabahaw nga pangandoy.

“Lipay kaayo and blessed to be part of this family. Since nga nadawat ko for this season, nangandam gyud ko. Ang akoa kay dapat daghan gyud og bala. Sige lang gyud og practice and nagpractice og daghang kanta nga lain-lain og genre,” niya pa.

Sa dagan sa kompetisyon, kanunay nga masulod ang ngalan ni Chreystle sa Top 3.

“Siguro when I sing, I always sing from my heart and soul. Murag gamit jud kaayo akong tibuok lawas mura siya og shiver. HAHAHAHAHA I always dedicate every performances sa Ginoo”, si Chreystle mipadayag.

Mahulagway ni Chreystle nga dili sayon ang iyang gitahak nga dalan paingon sa Platinum finals. “Kapoy pero nindut. Kapoy kay because nagtrabaho pud ko at the same time naa pud koy lain nga commitments gi-apilan. Pero bisag kapoy, since love man gyud nako ang pag-perform. Kun  naa nako sa stage kay mawala na ang kakapoy ug mawala na ang mga problemang ginahunahuna. I don't know, that's how powerful singing and performing for me”, si Chreystle miingon.

Karon nga aduna na’y gihuptan nga titulo si Chreystle isip Sinulog Idol first runner up, mas ganado na gyud siya mokanta pagbalik.

“Akong feeling after Sinulog Idol kay happy and na-excite sa mga adlaw na moabot. Mas na-encourage ko nga maningkamot para mo-improve kung unsa ang gihatag sa Ginoo kanako --- ang akong talent. And through Sinulog Idol I was able to witness kung unsa ka supportive akoang family and friends nga bisan kapoy kaayo sila gikan work and school ,maski walay mga tulog ,maski naa nay mga gipangbati nga sakit, giubo ug sip-on, willing gihapon sila magbarog the entire night to support me”, padayag niya.