Nakialam sa away ng magtatay, napatay

MANILA, Philippines - Kamatayan ang naging resulta ng pakikialam ng isang lalaki sa away ng isang magtatay matapos na siya ay saksakin ng anak na nairita naganap sa Quezon City.

Namatay habang ginagamot sa Novaliches General Hospital dahil sa dalawang saksak sa likod ang biktima na si Federico Calpito Jr., 45.

Nadakip agad ang suspek na si Gio Shay Arquisola, 18, salesman sa SM Novaliches at nakatakdang sampahan ng murder.

Batay sa ulat, bago nangyari ang krimen dakong alas-3:00 ng hapon sa harap ng isang pampublikong slaughterhouse sa Amparo Subdivision, Brgy. Nagkaisang Nayon, Novaliches ay nakita ng biktima na nagtatalo ang suspek at ang tatay nito na si Rogelio.

Dito ay lumapit ang suspek at pumagitna sa away ng magtatay na ikinairita ng batang Arquisola at siya ang pinagbalingan nitong saksakin ng dalawang beses sa likod.

Tumakas ang batang Arquisola at naaresto din sa follow-up operations sa bahay ng kanyang tiyahin.

Sa pahayag ng mga residente, madalas umanong nakikita ang mag-ama na laging nag-aaway sa hindi mabatid na kadahilanan.