CJL Sniper mitiklo sa Bert Enterprises sa Donling Cup

CEBU, Philippines — Mi-rally ang CJL Sniper sa fourth quarter aron moiskor og kulbahinam nga kadaogan batok sa Bert Enterprises, 48-42 sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.

Ligas kaayo ang duwa gikan sa first hangtod sa tunga-tungang bahin sa fourth quarter. Nagtabla pa gani ang iskor, 40-all sa 5:38 ang nahabiling oras sa maong kuwarter. Nangu sa maong rally mao ang best player nga si Farley Monterola, kinsa mikadlit og 13 puntos, 10 rebounds ug unom ka assists.

Miabag sab sa maong rally silang Nico Cojo ug Johnas Malubay diin matag usa kanila adunay sayes puntos alang sa CJL ni team manager James Lapinig. Ang Bert Enterprises ni Gilbert Sabal  gipangulohan ni Eugene Rosaldo nga mihipos og 14 puntos, gisundan ni Darwin Nara nga dunay 12 puntos.

Sa main game, ang Donling Aircon and Refrigeration Services walay puangod nga milubong sa undermanned nga New Era sa iskor nga 80-50 alang sa ilang 3-1 nga baraha.

Si Megume Bacus nga maoy best player of the game ang nangu sa Donling pinaagi sa iyang 16 puntos, lima ka rebounds ug pito ka assists. Sila si Ranny Colansi ug Homer Rosales nagtampohay'g 10 puntos alang sa team ni Romeo 'Don' Quilaton Jr.

Ang New Era ni Chris Ivan Batitay gipangulohan ni Bryan Yagonia sa iyang 18 puntos. Si Klent Mark Daug mitampo'g 14 puntos, samtang si Gong Tampus Jr. miamot og 10 puntos sa New Era nga wala pa'y daog sa tulo ka duwa ning maong liga nga giorganisar sa Brothers Ball League sa pagpangulo ni Marvin Sillar.