Cabaron Cup Basketball: Barili garantisado na og  luna sa semis

CEBU, Philippines — Ang Barili nagsandig nilang Crispin Villacencio ug Jomar Ravanta aron pakagingon ang Samboan, 73-63, sa krusyal nilang sangka sa Mayor Inocentes Cabaron Invitational Inter-Town Basketball Tournament didto sa lungsod sa Moalboal, habagatang bahin sa Sugbo.

Sila si Villacencio ug Ravanta mikadlit og 15 puntos matag usa alang sa Barili, nga nagsolo karon sa ikaduhang puwesto sa Bracket B uban ang 3-1 win-loss record.

Duha ka duwa ang ilang gintang sa nagharing Dalaguete nga nagkupot og perpektong 5-0 nga baraha.     Apan bisan og mapilde sa katapusan nilang duwa batok sa Sibonga, ang Barili garantisado na og luna sa crossover semifinals diin ilang makaharong ang No.1 seed sa Bracket A nga Dumanjug.

Sa laing engkwentro sa Final Four, mag-abot ang Dalaguete ug Aloguinsan.

Nakalabaw unta og dos puntos ang Samboan sa halftime, 37-35, apan dali kining gipapas sa Barili nga mao nay nagkontrola sa duwa uban ang 54-50 nga bentaha human sa tulo ka kuwarter. Nagpadayon ang pagbulhot sa opensa sa Barili dayon na ngadto sa pagkab-ot og 10 puntos nga kadaogan.

Si Raphael Charles Dinampo mipabuto og 21 puntos samtang si Miaco Gelacio midugang og 13 puntos apan parehong nangahoyhoy ang ilang abaga gumikan kay ang Samboan wa nay tsansa nga makasud sa semis human nakatilaw sa ikaduha nilang pilde sud sa lima ka duwa.