LeBron tak-om ang baba kabahin sa iyang ugma

CEBU, Philippines — Si LeBron James nagdumili pagpadayag kabahin sa iyang ugma sa NBA human ang  Los Angeles Lakers gitagak sa defending champion Denver Nuggets sa playoffs niadtong Martes.

Ang 39-anyos nga superstar mipakita nga hait gihapon ang iyang abilidad human miharos og 30 puntos, 11 ka assists ug siyam ka rebounds.

Apan dili kini igo alang sa Lakers, nga gipalukapa sa hingpit sa gamhanang Nuggets luyo sa 108-106 nga kadaogan sa Game 5.

Gituldokan sa dominanteng Nuggets ang ilang serye sa baraha nga 4-1.

Sa miaging season, si James daw sa nagparamdam nga moretiro na siya human gi-sweep ang Lakers sa Nuggets sa West Finals.

Sa miaging adlaw, ang mga pangutana kabahin sa sunod nga lakang ni James sa iyang karera maoy mipatigbabaw.

"I'm not going to answer that," tubag pa ni James sa dihang gisukna kon ang ilang kapidlihan sa mga kamot sa Nuggets mao na bay katapusan niyang pagsalida sul-ot ang uniporme sa Lakers.

"I just want to get home to the family honestly,"dugang pa ni James.

Si James duna pay buhi nga kontrata uban sa Lakers apan duna siyay opsiyon nga mobalhin og laing team.

Dako pa hinoon og posibilidad nga lugwayan ni James ang iyang karera ilabi na kay mipakita kini og interes nga moduwa sa Team USA sa umaabot nga 2024 Paris Olympics.