Shakey’s V-League Army masusubukan sa Cagayan
Laro Ngayon
(The Arena,
San Juan City)
2 p.m. PLDT
vs Air Force
4 p.m. Cagayan Valley vs Army
MANILA, Philippines - Ikaanim na sunod na panalo ang balak kunin ng malinis na Army sa pagbangga sa nagdedepensang kampeon Cagayan Valley sa Shakey’s V-League Season 11 Open Conference ngayon sa The Arena sa San Juan City.
Ang naturang laro ay magsisimula matapos ang pagtutuos ng pumapangalawang PLDT Home Telpad Turbo Boosters at Air Force Air Women sa alas-2 ng hapon sa ligang inorganisa ng Sports Vision at handog ng Shakey’s.
Pasok na sa quarterfinals ang apat na magtatagisang koponan pero mahalaga pa rin ang makukuhang panalo dahil bibitbitin nila ang baraha matapos ang elimination round sa susunod na round.
May limang sunod na panalo ang Lady Troopers at galing sa straight sets tagumpay laban sa PNP Lady Patrollers na sa 0-6 karta ay talsik na sa ligang may ayuda pa ng Accel at Mikasa.
Tiyak na bibigyan ang Army ng magandang laban ng Lady Rising Suns na winalis ang 16 na laro tungo sa paghablot ng titulo noong 2013.
Ang National University Lady Bulldogs at Ateneo Lady Eagles ang dalawang koponan na napapaboran na umabante pa dahil kailangan na lamang nila ng isang panalo para magpatuloy ang paghahanap ng titulo sa liga. (ATan)
- Latest
