6 ka teams mosalmot sa power forty X-mas league

CEBU, Philippines - Mosikad na sab ang 2010 Power Forty Christmas League basketball tournament ugmang adlawa diin modepensa sa ilang korona ang UTASSCO ni team owner Atty. Flor Yosores batok sa Park ‘N Go Bakeshop didto sa Inayawan Sports Complex.

Unom ka teams ang magsangka sa maong torneyo nga naglakip sab sa Water Market, Precious Ellah, Allyn & Sons ug F.E. Electrical Supply.

Ang Allyn & Sons makigsangka batok sa F.E. Electrical Supply sa primerong duwa ug sundan kini sa duwa tali sa UTASSCO batok sa Park ‘N Go.

Sa ikatulo ug kataposang duwa karong gabhiona, magtakos ang Water Market vs. Precious Ellah.

Ang format sa maong torneyo mao ang single round robin diin ang top two teams mo-abante dayon ngadto sa semifinals ug ang nahibiling upat ka teams mag-agi og knockout matches.

Magtakos ang no. 3 batok sa no. 5 ug ang modaog maoy makigsangka sa no. seed atol sa semifinals samtang magtigi sab ang no. 4 batok sa no. 6 ug ang modaog maoy makigharung sa no. 2. Ang modaog sa semifinals maoy mag-abot sa best-of-three finals.

Ang mga team owners sa Power Forty mao ang mosunod; UTASSCO gipanag-iya ni Atty. Yosores, Vestre Eleguin sa Water Market, Romy Rama sa Park ‘N Go Bakeshop, Junry Rabadon sa Precious Ellah, Sllyn-Nelly Cabase sa Allyn & Sons ug Chino Kalinga sa F.E. Electrical Supply. Ang commissioner mao si Edwin Dejacto, ang chief referee sa CESAFI.

Ang kampiyon sa maong torneyo makadawat og ganting cash nga P7 mil, ang seocnd placer P5 mil, ang third placer P4 mil ug ang fourth placer P3 mil . (BANATSPORTS)