Sally Mae Siso midaog duha ka korona sa 15th Gullas Tennis Cup

CEBU, Philippines - Gipamatud-an ni Sally Mae Siso nga mas hawod pa siya sa iyang maguwang nga si Sallydine dihang yano ra kaayo kini niyang gipukan sa girls 18-under final sa 15th Gullas Cup niadtong Domingo didto sa Cebu Country Club tennis court.

Apan walay suwerte ang ilang igsuong si Niño human mapakyas sa iyang kampanya sa boys division batok ni Israel Abarquez.

Si Sally Mae mibawos ngadto ni Sallydine pinaagi sa paghapak og 6-2. 6-1 nga kadaugan aron pagdaog sa girls 18-under title. Kahinumduman, si Sally Mae napukan ngadto sa iyang igsuon sa ilang engkuwentro sa final didto sa Dumaguete.

Mihimo'g dobleng kadaugan si Sally Mae dihang mi-iskor siya'g 6-0, 6-0 batok ni Krissiane Issa Kintanar aron paghari sa girls 16-under category.

Sa boys 18-under division, si Niño Siso wala kasugakod ug nasugamak ngadto ni Abarquez, 6-4, 1-6, 10-8 sa final.

Sa laing bahin, milansang sab og dobleng kadaugan si Alexie Santos sa Palawan pinaagi sa unisex 10-under ug sa girls 12-under.

Gipulbos ni Santos si Zehly Mae Alferez, 6-0, 6-0 sa girls 12-under ug dayon mipilde ni Gener Francis Lambayan, 6-1, 6-2 sa unisex 10-under final.

Si Christopher Encarnacion maoy miangkon sa boys 12-under title human mipatigbabaw batok ni Joshua Kinaadman sa Lapu-Lapu City, 6-1, 6-2, samtang si Ralph Juliane sa Pardo mao ang naghari sa boys 14-under human maka-ikyas batok ni Dennis Garlet sa tulo ka sets, 7-5. 1-6, 10-0.

Sa boys 16-under, si Fritz Satera maoy milangkat sa korona human gipilde si Dan Eldred Cinco, 6-0, 6-2, samtang si Crissiane Issa Kintanar misakmit sa girls 14-under crown pinaagi sa pagpaluhod ni Elgy Daisan sa Naga, 6-1, 7-6.   (BANATNEWS)