Ave Maria, Lahug magtigi karon

CEBU, Philippines -  Suwayan sa Ave Maria Sanctuary Park-USJR Jaguars nga molubong sa ilang ikaduhang daog sa dihang ilang sangkaon ang Lahug team karong gabii sa nagpadayong Talamban Summer Basketball League diha sa Talamban covered court.

Ugma mas aslom nga pagsuway ang masinati sa Jaguars dihang magbagat sila sa way pildeng Asian College of Technology (ACT) Cyber Knights ni coach Tata Merced.

Ang Jaguars, kinsa adunay 1-1 nga baraha, mosandig sa ilang mga beterano sama ni ex-pros Jercules Tangkay ug Danny Aying uban nilang Aldrin Ocañada, Jerry Jaca ug Ope Abellana.

Gawas sa mga beterano, mo-abag

sab nila ang mga pambato sa Jaguars ni coach Edito Salacut nga sila si Mannie Gabas, Armand Ponce, Jabe Delfino ug Kurt Amores.

 Ang Ave Maria maoy kampiyon sa collegiate division sa 4th CESAFI Partner’s Cup dihang ilang giharos ang San Marino Corned Tuna-USC Warriors sa 3-0 sa ilang "best-of-five" finals series. – BANAT NEWS