BFP Inter-color cagefest buksan karong Domingo

CEBU, Philippines – Andam na nga mopakita sa ilang abilidad ang kabomberohan dinhi sa Rehiyon 7 sa ipahigayong Bureau of Fire Protection (BFP) Inter-Color Basketball Tournament nga buksan karong Domingo diha sa Cogon Sports Complex, Cogon-Pardo, ning siyudad.

Adunay walo ka koponan ang mipadayag nga moapil sa torneyo ug kini mao ang Regional Office (Red), Cebu Province-North (Black), Cebu Province-South (Emerald Green), Cebu City-North (Aqua Blue), Cebu City-South (Gold), Mandaue City Fire Station (Lemon Yellow), Lapu-Lapu City Fire Station (Navy Blue), Talisay City Fire Station (Violet).

Matud pa ni Senior Supt. Aloveel Ferrer, Regional Director sa region 7, nga ang maong basketball tournament mopalig-on og maayo sa paghigalaay sa kabomberohan dinhi sa Sugbu.

Tumong usab sa maong liga mao ang paghatag og kalingawan ug paagi sa ehersisyo sa mga kabomberohan.

Molamas sa opening ceremony mao ang pagpili og "best muse."

 Mag-indigay alang sa best muse mao sila si FO1 Maricar E. Enfestan (Red), FO1 Grace Shiel Salutillo (Black), FO1 Jonaliz Alcayra (Emerald Green), FO1 Ainee Quiamco (Aqua Blue), FO1 Elsie Bautista (Gold), FO1 Blessie Castañeda (Lemon Yellow), FO1 Jasmin Mabini (Navy Blue) ug FO1 Faye Taboada (Violet).

Ang makampiyon makadawat og P5,000, ang second placer mobulsa og P3,000 ug ang third placer makaangkon og P2,000. – BANAT NEWS