Taktakay sa 2nd Mayor Casiano Gerona Cup

CEBU, Philippines – Gituhoan nga iladlad sa upat ka dekalibreng koponan ang tanan nilang tinagoang abilidad sa tinaktakay nga semifinals sa 2nd Hon. Mayor Casiano Gerona Cup basketball tournament ugma didto sa Tabuelan hardcourt.

Magsangka sa pasiunang duwa mao ang Dodong Lans ug La Familia Beach Resort nga gikatakda sa alas-7:30 sa gabii ug sundan kini sa duwa tali sa ABC ug Sto. Niño Lazers sa alas-9 sa gabii.

Ang mga mananaog maoy makaangkon og lingkoranan alang sa finals, samtang ang mga pilderong koponan maoy mag-ilog alang sa ikatulo nga dapit.

Ang tinaktakay nga kampiyonato gikatakda karong Hunyo 21 didto gihapon sa Tabuelan hardcourt.

Ang finals gikatakda sa alas-9 sa gabii human sa engkuwentro alang sa ikatulo nga dapit.

Ang Mayor Casiano Gerona Cup, usa sa mga kalihukan sa tinuig nga kapistahan sa ilang mahal nga patron San Juan Bautista nga saulogon karong Hunyo 23-24.

Gipasiugdahan ni Mayor Gerona, ang torneyo gisuportahan sab sa iyang anak nga si Vice Mayor ug Chairman sa Committee on Sports ug ingon man ni barangay councilor Arlie Perez ug Hon. Moises Trazo isip technical committee. – BANAT NEWS