Ave Maria, San Remigio Daug Sa Talisay

CEBU, Philippines - Daw naibtan og tunok ang Ave Maria Sanctuary Park dihang nakalingkawas kini batok sa Online-Chaesel Mae quintet ug mikulit og 74-72 nga kadaugan nga nagligas lang tungod sa lucky break samtang gilumsan sa San Remigio Beach Club ang Salazar Institute of Technology (SIT) Skyblazers sa iskor, 67-57 atol sa nagpadayong 1st M. Lhuillier Cup twinbill didto sa Talisay City Complex sa miaging gabii.

Posible untang modangat ngadto sa overtime ang duwa apan nailog ang pasa ni Jumel Lanutan ngadto kang Mark Jayven Tallo ug naka-ipsot gyud ang Ave Maria alang sa dos puntos nga kadaugan.

Ang kanhi Jaguar star nga si Bobby Hatague maoy nangu sa Ave Maria sa iyang 16 puntos samtang sila si Armand Ponce ug Jabe Kristewart Delfino parehong midugang og 13 puntos matag usa kanila.

Ang kadaugan naghatag sa Ave Maria og 2-0 win-loss nga baraha aron pagtabla sa San Remigio ug sa strong title contender nga CSD Power Brokers alang sa unang pwesto.

Sila si Alano Caputolan ug Michael Luga mi-iskor og 17 ug 16 puntos alang sa Chaesel May kinsa naghupot karon og 1-1 nga baraha.

Ang taas og layat nga kanhi UV Lancers star nga si Randy dela Pisa maoy nangu sa San Remigio Beach Club sa iyang 18 puntos.

Ang Skyblazers kinsa adunay 0-2 nga baraha, gipangulohan ni Arnold Gabica Jr. sa iyang 15 puntos.

Nagpadayon ang duwa kagabii didto sa Cogon, Pardo gym (dili sa Cogon,Ramos suma sa napatik) diin ang ACT Cyber Knights naglaum sa pagbangon human sila malukapa sa ilang debut batok sa CSD ug ilang atubangon ang Perfect Freight Forwarders samtang ang 24/7 ni Mark Abadia nagtinguha sab sa ilang ikaduhang kadaugan batok sa ACN/Binglens sa Labangon.

Hinuon, ning pagsuwat, wala pa hisayri ang resulta sa maong duwa.

Puntos kada usa:

First Game:

San Remigio Beach Club (67)— Dela Pisa 18, Abad 14, Esperat 8, Bruzon 7, Lao 7, Espina 4, Basco 3, Auditor 2, Cabrera 2, Mercader 2

SIT (57)— Gabica 15, Tumulak 12, Amagrato 12, Tampus 8, dela Vega 5, Cabrera 5

Second Game:

Ave Maria (74)— Hatague 16, Ponce 13, Delfino 13, Malinao 11, Antigua 10, Gabas 5, Llera 2, Pogoy 2, Desuyo 2

Online-Chaesel Mae (72)— Caputolan 17, Luga 16, Sampelo 15, Toring 7, Tallo 7, Resilla. -  BANAT NEWS