Mactan Hotmen abante sa finals sa Collector's Cup

CEBU, Philippines - Giharos sa Mactan Hotmen ni team manager Bingo Matugas ug coach Dacky Ugay ang tanang pito nila ka duwa sa eliminasyon pinaagi sa paglubong sa MJDL Brokers, 90-77 aron pag-abante sa finals sa 35-above division sa nagpadayong 14th District Collector’s Cup basketball tournament didto sa Vicente Sotto Memorial Gym sa barangay Punta Princesa, ning dakbayan.

Sa sayo pa, ang ex-SWU Cobra offguard nga si Sanshane Joseph Barita mi-iskor og 25 puntos lakip ang winning basket sa katapusang 12 segundos aron hatagan ang Enforcement Security Service (ESS) og 98-97 nga kadaugan batok sa Cebu-Customs United Personeros Association (C-CUPA) ubos gihapon sa 35-above category.

Mahinungdanon kaayo ang maong kadaugan sa ESS kay napakgang nila ang damgo sa C-CUPA nga moabante sa finals.

Ang Mactan Hotmen-Office of the Commissioner (O-COM) title showdown gikatakda karong Pebrero 25.

Daku unta'g kahigayonan nga modaog ang C-CUPA , apan misipyat si Amay Palad sa iyang katapusang tirada sa nahabiling otso segundos ug nailog sa ESS ang nausik nga bola dayong serbato sa buzzer.

Ang ESS gipangulohan ni Barita sa iyang 25 puntos, gisundan ni Jingjing Rama nga mitampo og 15 puntos. Samtang ang C-CUPA nga igo na lang moduwa alang sa ikatulong puwesto, gipangulohan ni Ronald Gasol, kinsa mibahog og 23 ug gisundan ni Albert Estrada sa iyang 22 puntos.

Sa laing bahin, si Ronnie Ruiz mipabuto og 22 puntos ug si Jumie Ararao mitampo og 18 puntos alang sa Hotmen, samtang si Noel Medalle maoy nangulo sa MJDL sa iyang 19 puntos.

Sa bugtong duwa sa 35-old below division, ang MJDL Brokers pabiling buhi sa ilang kampanya sa finals dihang ilang gibanatan ang SUGBO Brokers sa iskor nga 121-75.

Puntos Matag Usa

Unang duwa:(35 years above)

ESS (98) - Barita 25, Rama 15, Monteño 14, Sicat 12, De Gracia 9, Mabalo 8, Cabahug 7, Lozano 4, Regidor 2, Baregona 2

C-CUPA (97) - Gasol 23, Estrada 22, Sepe 14, Sigue 11, Palad 8, Geturbos 5, Agustinez 5, Embrada 5, Sena 2

Ikaduhang duwa: (35 years above)

Mactan (90) - Ruiz 22, Ararao 18, Mata 12, Clavano 11, Sella 9, Ambrad 7, Amores 5, Matugas 2, Baragona 2

MJDL (77) - Medalle 19, Nacario 14, Bacalla 11, Lambayan 8, Tuyco 6, Martinez 6, Dacumos 6, Lopez 4, Jordan 2, Baillo 1. – BANAT NEWS