Warriors kaging sa Golden Eye

CEBU – Gipakuratan sa F. Llamas Youth Association (FYA) Golden Eye ubos sa pagtimon nila ni kanhi University of Cebu (UC) Junior Webmaster Dondon Enriquez ug ni kanhi Salazar Institute of Technology (SIT) Junior Skyblazers Janus Abellana kinsa maoy nangu sa kulba-hinam nga 90-88 nga kadaugan batok sa FYA Warriors atol sa Game 2 sa ilang best-of-three finals sa 1st Coach Rady Cup basketball tournament didto sa Vicente Sotto Memorial gym sa barangay Punta Princesa, ning dakbayan.

Ang duha ka kanhi mga high school varsities parehong miburak og 18 puntos aron pangulohan ang opensa sa Golden Eye kinsa nakatala karon sa serye sa 1-1 nga baraha ug mosuway paglangkat sa korona karong umaabot nga Huwebes alang sa posibleng usa ka come-from-behind nga kadaugan.

Sayo unta nga gilubong sa Golden Eye ang Warriors tungod kay ilang gitapos ang first period sa iskor, 29-9 apan nianang pagka second period, migamit ang Warriors og usa ka makutas ug hugot nga depensa ug nagkapuliki og panagang ang Golden Eye kinsa nakahimo’g daghang sayop niadtong tungora ilabi na kay wala kahuygo ang ilang gigamit nga point guard sa second quarter.

Hinuon nakabawi-bawi og gamay ang Golden Eye ug ilang gitapos ang halftime nga may 52-40 nga abante.

Apan inay nga mosukarap, milampos gyud ang Warriors sa ilang tinguha sa pag-apas ug hangtod nga nakasikit sila ngadto sa 33-36 sa may 3:44 ang nahibiling oras sa third period human sa tirada sa dangug kaayong point guard nga si Dondon Cadungog.

Dihang milugak gamay sa depensa ang Golden Eye, nakahigayon gyud sa paglabaw ang Warriors pagsugod sa fourth period pinaagi sa three-point shot ni Cadungog, 67-64 ug gikan niadto wala na’y gusto magpabiya og daku ug nagsige na lang og sinukliay og puntos ang duha ka kampo diin dul-an sa 10 minutos nga milanat ang ilang see-saw battle.

Lain pa gyung three-point shot ni Aire James Alob nga maoy mipalabaw og balik sa Warriors sa iskor, 80-77, may 3:21 pa ang nahibiling oras sa duwa apan dali kining natubag ni Enriquez pinaagi sab sa iyang kaugalingon nga three-point play nga maoy naka-padisqualify sa iyang maguwang nga si Donald Enriquez ug natabla ang iskor sa 80-all ug pipila na lang ka minutos ang nahibilin sa duwa.

Si Enriquez ug si Abellana mao nay midala sa renda sa Golden Eye samtang nagkagamay na lang ang oras ug gi-abagan sab sila ni Mark Arias ug Eking Marata pinaagi sa ilang mga krusyal nga tirada. Sila na si Enriquez ug Arias maoy mi-iskor sa kataposang lima ka puntos sa Golden Eye pipila na lang ka segundos ang nahibilin aron pagselyado sa kadaugan.

Sa sayo pa, ang bullstrong nga si Tristan Rama kinsa mihakot og 15 puntos, maoy miwadwad og maayo hinungdan nga nabiyaan og daku ang Warriors samtang si Rosel Tabar mitampo og 13 puntos.

Si Cadungog mibahug og 20 puntos aron pangulohan ang Warriors samtang sila si Chissar Llegunas ug Alob may 16 ug 14 puntos mata’g usa kanila.

Ang tournament sponsor nga si Rady Abarintos wala makasaksi sa maong duwa tungod kay aduna siya’y gi-atiman nga bisita gikan sa Manila ug nakaanugon nga wala niya hiabti ang kulba-hinam nga kumbate.

Si tournament chairman Boogie Atillo mihatag og mubo nga lagda alang sa duwa alang sa hustong court decorum. Ang barangay kapitan sa Punta Princesa nga si Rolly Diorico usa sab sa mipaluyo sa maong proyekto ni Abarinto alang sa mga batan-on ug ilang nasabotan nga himoong mas daku ang torneyo sunod tuig.

Ang playing coach sa Golden Eye nga si Noel Medalle nanganti nga ila gyung sakmiton ang korona karong Huwebes aron pagkulit og kasaysayan sa 1st Coach Rady Cup.

Sa preliminary karong Huwebes, ang host nga FYA All-star makigtigi sa abilidad sa Labangon Youth Association (LAYA).

Puntos kada usa:

Golden Eye (90)— D. Enriquez 18, Abellana 18, Rama 15, Tabar 13, Marata 9, Bas 8, Brad 6, Arias 4, Medalle 2

Warriors (88)— Cadungog 20, Llegunas 16, Alob 14, Cambarihan 10, Enriquez 7, T. Marata 6, Abella 4, Navaja 4, Pacaña 2

 Halftime: 52-40. - Gabby G. Malagar (BANAT NEWS)