East Misidlak: James labing batang NBA All-Star MVP

Ang pagkamabayanihon ni Dwayne Wade, ang MVP performance ni LeBron James, ug ang kahanas sa 'Fab Four' sa Detroit Pistons maoy nakapabangon sa East All-Star gikan sa 21-puntos nga lubong dayon na ngadto sa paglup-og niini sa West, 122-120, sa NBA All-Star Game kagahapon didto sa Toyota Center sa Houston, Texas. Si James mipatuasik og 29 puntos ug kini maoy nahimong hagdanan sa alas sa Cleveland Cavaliers aron kab-oton ang labing daku nga pasidungog sa mabungahon niyang career gumikan kay siya may giilang labing batang All-Star MVP sa kasaysayan sa NBA.

Samtang si James gibayaw sa himaya sa iyang mga teammate, kagul-anan maoy miputos sa tibuok lawas ni Tracy McGrady sa Houston Rockets gumikan kay siya man unta ang MVP kon ugaling ang West pa maoy midaog sa maong engkuwentro.

Si McGrady miratsada og 36 puntos ug ang mainit niyang opensa maoy nakatuboy sa West pagpaburot og makalisang nga 21 puntos nga labaw, 75-73, sa nahabilin nga dos minutos sa ikatulong kuwarter.

Apan si James milansang og 13 puntos sa 28-13 run nga maoy nakapabuhi og balik sa dugo sa East All-Stars nga mao na ang naglabaw og 10 puntos, 117-107, sa nahabilin nga 3:29 sa duwa.

Ang West nakatabla, 120-120, human si Kobe Bryant mipasud sa iyang fadeaway shot sa nahabilin nga 32 segundos, apan si Wade madasigon kaayong milansang sa iyang follow-up shot gikan sa sipyat ni Allen Iverson sa nahabilin nga 16 segundos aron pagselyado sa kadaogan sa East.

Ang West naglaum ni McGrady aron pagtabla og usab sa iskor, apan wala kini kaugpo gumikan kay nadepensaan kini og maayo ni James. Nakuha ni Bryant ang bola, apan dali kining na-ilog sa East. "On his way up, I got a piece of his arm and a piece of the ball," matud pa ni James, nga mipasud og 12 sa 21 niya ka itsa. "I guess it was a great defensive play."

Si Wade mitapos og 20 puntos ug ang iyang teammate sa Miami Heat nga si Shaquille O'Neal midugang og 17 puntos. Si Iverson mitampo og 12 puntos alang sa East, nga nagbitbit og 35-20 nga bintaha batok sa West sa ilang all-time series.

Si Chauncey Billups miratsada og 15 puntos ug pito ka assists alang sa East. Ang iyang teammate sa Pistons nga sila si Richard Hamilton, Ben Wallace ug Rasheed Wallace dako sab kaayo og na-ambag gumikan kay ang solido nilang depensa maoy hinungdan nganong wala na ma-arti ang West sa second half.

Si Tim Duncan mipuntos og 15, samtang si Shawn Marion mikulit og 14 puntos alang sa West, nga nakapugnit lamang og singko puntos gikan sa teammate ni McGrady sa Rockets nga si Yao Ming.