EDITORYAL - Road rage sa dalan

Ang nahitabong hit-and-run diha duol sa Redemptorists Church sa Barangay Camputhaw, Cebu City niadtong Pebrero 4, 2024 dili lang ordinaryong aksidente kondili tinuyoan gyud matud pa sa kapolisan.

Dunay gipasakaan og kasong murder nga maoy ang drayber usa ka SUV nga matud pa nigamit pa gyud og blinker sa dihang nahitabo ang hit and run. Hinuon, ang maong suspek kusganong mihimakak niini.

Adto nalang niya kini iwadwad ang iyang depensa sa korte sanglit nasang-at naman ang kaso ngadto sa City Prosecutors Office.

Daghan na og mga kaso sa road rage, gani ang uban niini napatik pa gyud sa social media ug gipistahan sa mga netizens, dunay mga drayber nga gigukod sa Land Transportation Office ug gipang-revoke ang ilang mga lisensiya tungod sa iyang dili maayong taras diha sa karsada.

Kaning road rage daghan og hinungdan, apan duha ra gyud ang nag-ilog sa pwesto, ang ubos sa impluwensiya sa alcohol o bino ug kaning pagkakuwang lang gyud sa disiplina ug pailob sa drayber.

Kay kaning magmaneho nga hubog, bug-at kaayo kini og tiil ug kamot sa pagtunob o pagkumot sa gasolinador sa gimanehong sakyanan.

Tungod sa ilang dili 100 porsiyentong luwas nga pagmaneho usahay masipyat gyud ug makakita og bikil sa ubang motorista, ang nakaparat, kay lagi nakainom, ilang pagtuo sila maoy sakto ug sayop ang ilang gikalalis.

Mao sab kini sa mga tawong kuwang lang gyud og road courtesy o disiplina samtang nagmaneho.

Dunay uban dili man tuod hubog, apan initon ug saputon gyud og ulo. Isog kaayo kun makamaneho nga daw sila maoy tagiya sa karsada ug maoy pirmeng sayup ang uban samtang sila perpekto.

Likayan gyud unta sa mga drayber nga motaas ang tingog kun dunay aberyang masugatan diha sa karsada.

Kay pagkatinuod, ang kaning mga saputon nga drayber, kung dili sila maoy makapatay og laing motorista, posibleng sila maoy mapatay tungod sa ilang kinaiya.

Unsa kaha no kun himuon sab nga rekisitos ang pagpaubos sa neurological examinations sa tanang mokuha og driver s license aron siguraduhong ang hatagan og prebilihiyong makamaneho kadto ra gyung sakto og panghunahuna?