Eksperimento

Ang Rice Tariffication Act gipalabang sa Kongreso sa nasud aron hulipan ang Agricultural Tariffication Act of 1996. Tumong aron hulipan ang Quantitative restrictions nga sistima sa pag angkat og bugas sa gawas sa nasud pinaagi sa sistima nga puro lang gyod taripa. Rason, gituohan sa mga magbabalaud nga ang paglimita sa suplay sa bugas sa merkado moresulta sa pagtaas sa prisyo niini.

Apan ang nahitabo, daw sama sa rocket nga misulbong sa kawanangan ang prisyo sa bugas sa merkado. Asa naman ang barato nga bugas nga mao untay puntarya sa mga magbabalaud sa pagpalabang sa nahisgotang balaud.

Ang Rice Tariffication Act nahisama sa Oil Deregulation Law nga gipalabang sa kongreso aron maminusan kon dili man mapakgang ang pagsige og saka sa prisyo sa lana.

 Gibuak ang monopoliya sa lana sa tulo ka higanting Shell, Caltex ug Petron ug giablihan ngadto sa merkado ang negosyo sa lana aron mosulod ang mga bagong kompanya nga makamugna og kompitisyon. Gitoohan sa mga magbabalaud nga mabolahan ang mga konsumidor sa kompitisyon.

Tinuod, namugna ang kompitisyon sa mga kompanya sa lana apan kompitisyon kini sa pagpataasay sa prisyo sa ilang produktong petrolyo ug dili sa pagpaubos sa prisyo niini.

Mao kini ang nahitabo sa Rice Tariffication Act. Naglumbaanay sa pagpatas-anay sa prisyo sa ilang bugas ang mga mamaligyaay og bugas.

Sa Rice Tariffication Act gikuhaan og gahom ang National Food Authority (NFA) sa pag angkat og bugas sa gawas sa nasud ug sa pagbaligya niini sa merkado. Resulta, dili kana makapalit og tag 27 o tag 32 pesos matag kilo nga bugas sa merkado.

Sa wala pa kuhaa sa mga magbabalaud ang gahom sa NFA sa pagpamaligya og bugas sa merkado, adunay kapilian ang mga kabus sa pagpalit og baratong bugas. Karon wala na.

Tingoha karon ni House Speaker Martin Romualdez ang pag amendar sa Rice Tariffication Act aron ibalik ngadto sa NFA ang gahom sa pagbaligya og baratong bugas sa merkado.

Mubo raba og panglantaw ang atong mga magbabalaud kay dili man nila makita ang epekto sa balaud ngadto sa unahan sa mga balaud nga ilang gipalabang?