EDITORYAL - Nagpadaugdaog sa kaugalingong tugkaran

Makasagmuyo ang mga nanggawas nga mga videos bahin sa pagbomba na sab sa Chinese Coastguard sa mga barko sa Philippine Coastguard diha sa Scarborough Shoal kagahapon sa buntag.

Sumala pa sa PCG, ang mga barko nga BRP Bagacay ug ang BRP Bangkaw sa Bureau of Fisheries and Aquatic Resources (BFAR) nagpahigayon og supply mission para sa mga mananagat nga nanagat sa Scarborough Shoal.

Apan kalit silang gibabagan og napulo ka mga barko sa China, unom niini mga militia boat ug upat ka barko sa Chinese coastguard.

Sama sa nangaging mga pagpangatake sa Chinese Coastguard diha sa West Philippine Sea, kalit nilang gibabagan ang mga barko sa Pilipinas ug wala pa gyud matagbaw, gibombahan nila kini og tubig.

Gitutokan nila og bomba ang navigation radar sa BRP Bangkaw hangtud nga naguba kini, mura og gusto gyud nga gub-on ang maong ekipo.

Unsa may tumong niini? Butahan ang maong barko sa kapabilidad nga makanabigar sa lapad nga kadagatan sa West Philippine Sea.

Sumala pa sa United Nations Conventions on the Law of the Sea (UNCLOS) ang Scarborough Shoal naa sa sulod sa 200 nautical miles (370 km) exclusive economic zone (EEZ) sa Pilipinas tungod kay kini naa lang sa 120 nautical miles o 222 kilometros gikan sa Luzon.

Ang Scarborough nga gitawag sab og Bajo de Masinloc o Panatag Shoal dunay gilay-on nga gibanabanang kapin 900 kilometros  o 485.961 nautical miles gikan sa pinakaduol nga baybayon sa China nga mao ang Hainan Island.

Ang mga panghitabo nakita sa tibuok kalibotan nga maoy gigamit nga estratehiya sa Pilipinas aron i-expose ang mga ilegal nga gipanghimo sa China diha sa WPS.

Ang Scarborough Shoal gideklarar sa Arbitral Tribunal niadtong 2016 nga kabahin sa teritoryo sa Pilipinas ug walay basihan ang pagangkon sa China sa maong lugar.

Kung hangtud kanus-a kutob kining pagpadaug-daog sa mga Pilipino diha sa kaugalingon niining teritoryo, ang gobiyerno ra maoy makatubag.

Apan mahinungdanon gyud kaayo nga ang sunod nga mga lider nga botaran sa mga Pilipino, kadto gyung mga kandidatong wala magtakuban nga magpakaaron-ingnong nagmahal sa Pilipinas apan sa laing nasud diay ang kasingkasing.