Mas maayo pa ang latolato kay sa gadget

Kining latolato nga duwa kaniadto ra man kini nauso bisan gani sa ako pang pagkabata apan nibalik naman usab kini karon ug mas nakamugna og dakong kasikas kay lagi adunay negatibong epekto ilabi na sa mga bata. Duna nay mga dapit nga gustong ipa-ban kini ug naa na ganiy gidili na gyud ilabi na sa mga eskwelahan.

Apan makadaut ba gyud kini? Depende seguro kong masobrahan ang paggamit niini kay makadisturbo na usab sa mga tawo ang hilabihan ka saba niini ug mataligam-an na sad seguro ang pag eskwela. Ang.tanan nga masobrahan makadaut gyud.

Kong itandi sa gadget mas mopabor pa ko sa latolato kay alang nako nahibalik ang gana sa mga bata sa duwa sa kaniadtong panahon, inay magsegi og tutok sa gadget naka-focus sila sa duwa nga walay kalabotan sa teknolohiya.

Mas daghan og kadaut nga namugna ang pagkahilig sa mga bata sa mga gadget sama sa mga balatian nga makuha niin, gani ang uban gikataho nga naa gyuy nalandig sa tambalanan o nakabsan sa kinabuhi kay na addict sa mga cyber games wala na makakaon ug nisangpot sa pagkasakit na hinuon.

Ingon ani man gud ang batasan sa uban nga kong mosikat ang usa ka butang naa gyud dayon moingon nga naay side effect. Sa usa ka programa sa telebisyon giingon nga nanglagom ang mga kamot sa bata tungod sa lato lato, apan ang tinood naa na diay daan balatian kini ug napasanginlan lang ang iyang pagsuwa sa lato lato.

Sa paghibalik sa uso sa duwa nga atong nadak-an mas angayan nga atong hangpon, dili lang gani ang lato lato dili mas angayan ipauso og balik ang patentero, buwan buwan, shatong, jackstone ug uban pa.

Sama niining mga tradisyonal nga duwa makamugna og kadaut kong mapalabian apan kong ma-regulate lang maghatag kini og katagbawan ilabi na sa kabataan.