Pilipino pa ang dumedepensa sa mapandurong China?
NAKALULUNGKOT. Magbasa ka ng mga komento sa Facebook at marami ang kumukutya sa mga Pilipinong mangingisda na lulan ng isang bangkang binangga at pinalubog ng isang barko ng China. Imbes na damayan nila ang kanilang pobreng kababayan, kinakampihan pa ang China. Kumbaga noong panahon ng World War II, ang mga ganitong klase ng tao ang mga collaborators ng kalaban. Hindi ang China ang ating kalaban kundi yung mga Tsinong lulan ng barkong bumangga sa fishing boat ng mga kababayan nating nangingisda lang sa Recto Bank.
Pero lumilitaw na kalaban natin ang China kung ito’y kukunsinte sa baluktot na gawain ng mga Tsinong laman ng barkong nagpalubog sa fishing boat ng mga Pinoy.
Sinasabi ng mga pro-Duterte na ang insidente ay paninira lang sa administrasyon na alam nating lahat na pinagyayaman ang diplomatikong relasyon ng Pilipinas sa China. Damayan naman natin ang mga mangingisdang ito sa halip na kutyain. Nagpalabas na ng press statement ang Tsina na nagsasabing aksidente ang nangyari at hindi sinadya gaya ng akusasyon ng mga mangingisdang Pinoy.
Para kay Sen. Francis Pangilinan, “kasing peke ng salaysay ng China ang pag-angkin nito ng teritoryo.” Kung ihahambing nga naman ang ipinalabas na statement ng China sa salaysay ng mga Pilipinong mangingisda, walang duda kung sino ang biktimang ginipit at nagsasabi ng totoo. Tama si Kiko. Ang alegasyon ng China na pinalibutan ng mga bangkang pangisda ang kanilang barko ay pinasinungalingan ng mga satellite photos.
Ngunit sa kabila ng nagdudumilat na katotohanan, tila marami ang kumakampi pa sa China. Huwag naman po sana. Umaasa pa rin ako na gagawa ng karampatang hakbang ang gobyerno kaugnay ng malinaw na pambu-bully ng mga tripulante ng China sa mga Pilipinong mangingisda sa West Philippine Sea.
Sabi ni Pangilinan, “sadyang nakakagalit, kundi pa man nakakapanuya, na patuloy pa ring naghahanap ng butas ang China para hindi managot sa muntikang pagkamatay sa laot ng ating mga Pilipinong mangingisda. Sa ganitong pamumustura, hindi ipinapakita ang katapatan ng isang kaibigan daw.”
Hinihintay ng marami na magpakitang galit si Presidente. Siya ang leader ng bansa at siya ang dapat tumayo at magsalita para sa kapakanan ng ating mga kababayan.
- Latest
