Anhing Boboy mipakita sa suod higala

Sa miaging mga semana mipakita si anhing Gaudioso “Boboy” Bontilao sa iyang suod nga higala ug kauban sa trabaho (ngalan gipugngan). Malipayon kuno kaayo si Boboy nga grabe kahayag ang gisul-ob niining lubos puti nga sinina. Matud pa sa maong higala, nakig-estorya kuno kini niya’g kadiyot nga labihan kasanag ang panagway.

Miingon kuno si Boboy: “Kumosta na man mo, dinhi? Naka-jackpot ba sab mo?”

Motubag unta ang nahisgotang higala. Apan kalit lang nawala si Boboy sa iyang panan-aw dungan sa iyang pagmata. Nagdamgo lang diay siya.

Gisuginlan ko ang maong amiga ni Boboy unsay mensahe nga buot ipadayag sa maong damgo. Giingnan ko siya, nga ang jackpot nga gisulti ni Boboy nagpasabot nga suwerte kaayo siya sa iyang kamatayon. Kay gidala siya sa Ginoo deretso sa Langit. Ug wala na iagi sa purgaturiyo.

Nakita sa Ginoo nga gituman ni Boboy ang tahas nga gipabuhat sa atong Magbubuhat kaniya dinhi ibabaw sa kalibotan. Ang pagpangalagad niya sa katawhan, diin wala siya’y pili: higala man, o kaaway...silang tanan iyang gihigugma...nianang gugma nga wala’y kondisyon ug wala’y kinutoban. Mission accomplished na. Mao nga gi-recall na si Boboy sa atong Ginoo nga gipaagi la’g disgrasya (iyang motorsiklo gidaro sa Honda civic nga maoy hinungdan sa hinanali niyang kamatayon).

Kun ang lawas ni Boboy ray tan-awon sa mga minahal sa iyang kinabuhi, sakitan ug maguol gyud silang magtan-aw. Kay nangagupok man ang bukog niini ug miliki-tuay pa gyud ang ulo. Apan lawas ra kini. Timan-i, nga ang tawo is composed of body and soul. Only the body will perish, but the soul will live forever. Ug mao ni ang nahitabo ni Boboy. Tungod kay iyang gipuy-an ang mga pulong sa Ginoo sa buhi pa siya ning kalibotan, ang iyang kalag gideretso’g dala sa Ginoo sa Langit dihadiha...human mamatay ang iyang lawas.

Hinungdan, nga sa damgo, nangutana si Boboy: “Naka-jackpot ba sab mo?” Gipahinumdoman niya iyang amiga nga kun gusto tang mga buhi nga direktang makapuyo sa Langit, kinahanglang sundon nato ang mga langitnong binuhatan ni Boboy nga iyang gibilin ning kalibotan. Buwahan, sama niya, maka-jackpot sab ta. Makasulod pud ta’g deretso sa Paraiso pag-abot sa atong turno.