Inahan gi-martilyo sa anak

Subo kaayo palandungon nga ang anak nga gimabdos og siyam ka buwan ug gihimugso nga naglatay sa lugas lanot ang kinabuhi dihang gihimugso kini aron lang mabuhi ug giatiman pagmaayo nga dili gani patugpahan og lamok, mao ba diay ang mounay sa pagkutlo sa kinabuhi sa babaye nga maoy naghatag kaniya og kinabuhi.

Kini ang nahitabo sa lungsod sa Panglao, lalawigan sa Bohol. Gimartilyo sa 15-anyos nga lalaki ang ulo sa iyang 46-anyos nga inahan nga misangpot sa kamatayon niini. Dili pa igo, gihulog pa sa anak ang lawas sa iyang inahan sa abandonadong septic tank. Dihang nanimaho na ang lawas, nadiskobrehan ang krimen ug miangkon ra usab ang bata sa iyang gihimo nga krimen.

Gikasab-an matud pa sa inahan ang anak kay dunay isyu sa eskwelahan hangtud naabot sa punto nga wala makaagwanta ang anak. mikuha kini  og martilyo dayon bunal sa ulo sa iyang inahan. Ingon ana lang ka sayon gitapos sa anak ang kinabuhi sa iyang inahan, nga maoy nahimo niyang kauban ug katambayayong sa tanan aron lang siya mahatagan og hayag nga kaugmaon sanglit ang iyang inahan ra ang nagbuhi kaniya.

Unsa man gyud ang naka-trigger sa bata nga kutloan og kinabuhi ang iyang inahan? Kini ang angayang tutokan sa kapolisan kay posibleng duna pay lawom nga hinungdan.

Ibutang ta lang wala na kaagwanta ang bata sa hilabihan ka yawyawan sa iyang inahan, dili pud seguro mosangpot sa brutal nga binuhatan—hinuon depende sa agwanta sa bata kay basin og putong kaayo kini, napanglimotan ang kaugalingon, o nayawaan matud sa uban ug napatay ang iyang mama.

Dunay mga pagduda nga basin naimpluwensyahan kini sa online games, nga maoy gisubay usab karon sa mga otoridad. Kay matud pa, duna may mga tahas kining himoon aron ma-push sa limit ang bata, himoon ang tanan bugti kon unsa man ang gihaylo kaniya nga maangkon.

Sa panahon karon, daghan ang mga factor nga maka-influence sa kinaiya, dagan sa pagbati, ug sa panghunahuna sa mga tawo, ilabi na ang linghod nga pangidaron sa mga bata nga mohimo sa mga butang dili unta angayang himoon. Isip mga ginikanan, dakong responsibilidad ang pagmonitor sa kalihokan sa mga bata, ilabi na sa online portals nga ilang pagatan-awon. Ang ubang mga ginikanan pud, pasagdan ra man ang mga anak nga magyampungad sa gadget kay sa mabalda ang ilang gimbuhaton.

Labaw sa tanan, gikinahanglan sabton sa ginikanan ang kinaiya sa mga anak. Dili palabian og kasaba, inay estoryahon o maymayan aron mokalma ug maminaw, kay kining mga edara init pa kaayo ang buot ug dunay higayon nga dili nila makontrol ang ilang kaugalingon. Dunay mga higayon nga masobrahan pud ang mga ginikanan sa pagdisiplina sa mga anak nga dili nila matagdan nga nakapasakit na sila sa pagkatawo sa bata, hinungdan nga mamahimo nang bato ang ilang pagbati kay naipon na ang pagdumot gikan sa kanunay nga pagtratar kaniya nga usa ka kontrabida, badlongon, ug gahi og ulo.

Bisan unsa ka pating ang usa ka bata, basta giyahan kini sa sakto nga pamaagi uban sa pagpabati sa gugma, malukmay ra man seguro ang kasingkasing sa bata. Hinoon, case-by-case basis kini kay duna gyuy mga anak nga sungayan nga bisan unsa ang kaayo sa ginikanan, ila gyud nga sungagon kay naimpluwensyahan na naman sa bisyo, apil na niini ang adiksyon sa drugas ug adiksyon sa digital games.