Mga hagit sa bag-ong hepe sa kapolisan

Gipunting karon sa katawhan sa dakbayan sa Sugbo ang mahimo unyang kalampusan sa paghupot sa katungdanan ni Senior Superintendent Noli Romana nga nahimong kontrobersiya  dihang gihugonhugon pa nga maoy gipili ni Mayor Michael Rama nga modumala sa kapolisan sa dakbayan sa Sugbo.

Gialigar man god ni kanhi Police Regional Office 7 Director Marcelo Garbo nga wala makapakita og maayong labok si Romana sa iyang pagdumala sa kapolisan sa Negros Oriental sa pagpakgang sa mga illegal nga sugal sama sa masiao nga maoy iyang gibasehan sa pagrelibo sa katungdanan.

Ang mga pasangil kang Senior Superintendent Romana wala makapilo sa baroganan ni Mayor Rama sa  pagpili kaniya nga maoy mangulo sa kapolisan sa dakbayan sa Sugbo hangtod nga nahatagan gayod kini og katumanan.

Kining maong katungdanan karon nga iyang gihuptan isip pangulo sa kapolisan  sa dakbayan sa Sugbo usa kini ka dakong hagit sa iyang pagpangalagad sa katungdanan sanglit pinaagi sa mga kalampusan unya nga iyang maangkon mao man ang magpapas sa mga pasangil nga naghimo na hinuon kaniyang kontrobersiya nga opisyal sa kapolisan.

Hinuon ang angayang tutukan usab sa pagtan-aw ni Superintendent Romana ang iyang mga sakop sa kapolisan nga maoy labing nasinati sa kahimtang sa Sugbo ilabi na sa pag-ila sa mga nalambigit sa illegal nga drugas ug illegal nga sugal nga numbers game sama sa masiao nga suwertres ug  Jai Alai.

Angayan niyang pilion ang kasaligan nga mga sakop nga sinsiro sa pagpangalagad sa katungdanan kay sila man maoy labing nasayod apan wala lamang kini makalihok kay ginapos man ang mga bukton sa impluwensiyado niining mga kauban nga maoy hinungdan sa ilang pagpangiyugpos ug nagpaabot na lamang sa linugdangan.