Destination disease

Wala nako’y mahimo ini. Bahala na ang kapalaran. Kini maoy giingon sa akong suod nga higala. Nataptan siya og usa ka destination disease. Si John Maxwell ang buot mopahinumdom kanato nga diha sa kinabuhi, mahinungdanon kaayo ang pag-ila sa kalainan tali sa decision making ug decision management. Ang matag desisyon adlaw-adlaw nato nga himuon (Decision Making) apan ang pangutana kun sila ba ingon nga desisyon mahinungdanon ba gyud kaayo?

(Decision Management). Mao nga si Walt Disney diha sa mga higayon nga siya dunay proyekto nga pagahimuon ang dili gyud maglangan sa ugma ni mobalik siya sa kagahapon. Iya gyud dayon kining himuon ana gyung adlawa. Si Maxwell sa laing bahin ang mopahimug-at nga kinahanglang himuon nato ang atong mga prayoridad karon gyung adlawa. Dugang pa, ang atong kaugmaon ang mag-agad sa atong pagpili karong adlawa.

Unsaon naman diay ang kabubut-on sa Dios Padre? Aw, anaa man gihapon kay kanunay man na. Apan angay natong hinumdoman nga ang Dios dili mamugos. Mag-unsa man kun ikaw pilion apan ikaw mismo nga gipili ang magdumili pagsubay sa dalan nga gitanyag sa Dios alang kanimo nga imong subayon? Kalas-ay naman sa kinabuhi kun mora lamang kita og kabayo kang kansang mga mata gitaptapan lamang sa renda ug mag-agad lang sa latos sa hubog nga kutsero.