Ratings ni P-Noy

Napu’ ka buwan sa katungdanan, nag-anam na pag-ubos ang approval rating ni Presidente Noynoy Aquino. Kung basehan ang survey result sa Pulse Asia nakakuha ang presidente og 74% approval ratings mas ubos kini og 5% kun itandi sa survey nga gipahigayon niadtong Oktobre sa miaging tuig. Ang pagtuon gihimo atol sa mga panahon nga gi-atubang ang mga isyu sa impeachment batok ni Ombudsman Merceditas Gutierrez, ang pagdungog sa kaso sa korapsyon sa AFP, ang pagpapauli sa mga OFW nga napiit sa kagubot didto sa Middle East ug ubang bahin sa Africa.

Kun ang Malacanang ang pasultihon, wa’y angayan nga ikabalaka tungod kay dili dako kaayo ang pag-us-os sa marka sa presidente. Dugang sa kampo ni Aquino, normal lang nga mo-ubos ang ratings sa presidente tungod kay anaa sa iyang panga’n nahapak ang tanang problema nga gisagubang sa nasud.   Alang sa mga dumadapig ni Aquino wa’y angayan nga ika-alarma tungod kay positibo gihapon ang resulta sa ratings itandi sa niaging administrasyon nga nilukapa pag-ayo ang ratings hangtud sa katapusang adlaw sa iyang pamunoan.

Karon, nisaad si P-Noy og mas agresibo nga kampanya ug pagpahibawo sa publiko sa mga maayong lakang nga nahimo sa iyang pamunoan inay itago ang mga maayong nabuhat sa iyang administrasyon. Giklaro sa presidente, su’d sa pipila ka buwan, nagdumili sila sa pag-alsa sa ilang kaugalingon nga mga bangko tungod kay buot nilang motrabaho sa mas hilom nga paagi. Nakalimtan siguro sa mga adviser sa presidente nga ang mas labing mahinungdanon nga himuon sa iyang public relations group mao ang pagpalapad ug pag-alsa sa bangko sa presidente. Ang labing mahinungdanon nga tulomanon nila mao ang paghatag sa mga tawo sa mga maayong nabuhat sa presidente.

Nakalimot siguro ang kampo ni P-Noy unsay ka mahinungdanon nila kaniadto ang survey result sa iyang pagdagan pagka-presidente? Nakalimot siguro ang iyang mga adviser nga ang ‘daang matuwid’ nga kampanya ni P-Noy aron hingpit nang mapapas ang korapsyon sa gobyerno ug mahatagan og sulbad ang problema sa kakabus, ang usa sa labing mahinungdanon nga aspeto nganong nisulbong ang ratings ni Aquino nga sa kaulahian maoy naghatud kaniya sa kadaogan. Nakalimot siguro sila nga sa miaging tuig, gamay lang nga pag-us-os sa approval rating sa presidente magkalisang na ang ilang grupo sa pagbutang sa iyang mga political ad, pag-ilis sa iyang porma ug paghimo sa mga bag-ong istratihiya aron mabawi ang nawagtang nga pagsalig sa mga botante.

Ang nakapait kung magpabiling ‘humble’ ang gobyerno sa ilang mga nahimo, di’ mabati sa mga tawo ang mga maayong nabuhat sa administrasyon hangtud nga moabot sa ilang tiyan ug sa ilang panimay ang mga maayong lakang sa gobyerno. Kung magsalig lang ang mga adviser sa presidente sa taas pa kaayo nga approval rating, di’ halayo nga ang 5% nga pag-ubos karon sa iyang marka, mosaka pa hangtud nga magkisi-kisi na sila unsaon nga maulian ang katawhan sa ilang di’ maayong impresyon sa gobyerno.   Angayan nga hinumduman nga ang tinguha nga paglimpyo sa atong gobyerno gikan sa korapsyon, imposibleng mahitabo su’d sa 6 ka tuig sa katungdanan ni P-Noy. Apan mag-unsa man ang maong panawagan kung mismong ang nangu sa maong kawsa, nilukapa na og maayo ang approval rating?

Email: [email protected] or [email protected]