Tungod sa kainila

Pipila ka bulan na lang ug magpili na usab kita og mga opisyal alang sa senado hangtud sa konseho sa tagsatagsa nato ka lugar.

Balita na kaayo ang giingong pagkandidato sa mga beteranong aktor nga sila si Richard Gomez pagka-senador ug Cristopher de Leon pagka-kongresista sa Batangas. Hinuon ang duha ka inilang aktor wala pa sukad makakupot og bisan unsang katungdanan nga makahatag og suporta sa ilang kandidatura.

Klaro nga ang duha nagsalig sa ilang pagka-popular alang sa ilang kandidatura. Tungod niini, dako gayod ang tsansa sa ilang pagdaug.

Kasagaran nang mahitabo dinhi sa Pilipinas nga kadtong mga artista dunay dakong kahigayonan nga modaug matag eleksiyon. Dili usab nato mabasol ang katawhan gumikan kay sayon lamang silang nahaylo sa pagkainila niining mga tawhana.

Sa hawanan sa Senado, tulo ka banggiitang artista ang kasamtangang nagpasinaw sa ilang mga lingkoranan sa Taas Balay Balauranan karon. Ug siguro nga daghan kanato ang makaingon nga napili sa maong puwesto sila si Lito Lapid, Jinggoy Estrada ug Bong Revilla dili tungod sa ilang pagka-maayong sulogoon sa katawhan kondili pinaagi sa ilang pagka-dagkong personalidad isip mga artista.

Tuod man si Lapid nahimong gobernador sa Pampanga sa tulo sa termino, si Estrada nahimong mayor sa San Juan, Metro Manila sa taas nga panahon, ug si Revilla nahimong bise gobernador sa Cavite sa usa ka higayon. Apan igo na ba kana nga garantiya sa ilang maayong pagpanday og mga balaud sa hawanan sa Senado?

Sa unang panahon, ang Senado usa ka sagrado nga lugar diin ang sama lamang kanila ni Aquino, Diokno, Salonga, Romulo, Recto ug uban pa maoy kanunay nga naghulma og mga balaud. Apan karon, ang Senado maoy dapit diin pulos politikanhong interest lamang ang nangibabaw sa mga kasamtangang nag-okupar nga walay laing nahunahunaan kondili ang pagpahigayon og mga imbestigasyon sa mga kahiwian sa administrasyon.

Apan nakadungog ba kita nga kining mga artistang senador dunay dakong nahimo alang kanatong mga pordoy sa katilingban? Si Estrada giingong grabe nakapanghambog nga ikaupat kuno siya sa mga senador nga dunay daghang napanday'ng balaud.

Apan sa akong nakit-an ni Estrada sa iyang mga privilege speech sa hawanan sa Senado, puro lamang batikos ni Ilocos Gov. Chavit Singson ang iyang gihimo. Kini isip siguro panimalos sa pagkahagba sa administrasyon sa iyang amahan diin si Singson maoy hinungdan.

Mao ba kana ang klase sa senador nga angay natong tuohan?

Mora'g hinambog ra kaayo nga paminawon kini'ng mga privilege speech ni Estrada batok ni Singson gumikan kay samtang gamulo ug nibatikos si Estrada sa iyang giingo'ng mga kahiwian sa gobernador sa Ilocos, dili malikayan nga daghan usab ang makaingon nga puro pamolitika lamang kini ni Estrada.

Kanus-a pa kaha kita makaamgo gikan sa atong pagdinanghag pagpili og mga lideres sa atong nasud? Nagpasabot ba kini nga kulang pa gihapon kita sa edukasyon pagpahayag sa atong polikanhong katungod?

Hinuon, dili tanang artista nga anaa karon sa katungdanan og kadtong mga mokandidato ang walay mga hibangkaagan. Pipila kanila ang makamao usab ug dunay dedikasyon sa pagserbisyo sa katawhan.

* * *

Ipadala inyong reaksiyon sa [email protected]