Buslot sa siguridad

Sa makausa pa, gatusan sa libo ka katawhan ang magpunsisok sa kadalanan sa dakbayan sa Sugbo aron pagsaksi sa tinuig nga Sinulog Festival karong adlawa. Naandan na kini sulod na sa pipila ka dekada sa mga Katoliko isip pahinungod sa Senior Santo Niño.

Ang pagpahigayon sa Sinulog nagdani usab og liboan ka mga turista, langyaw man o lokal, dinhi sa dakbayan. Gani, ang Sinulog man ang giila sa Department of Tourism nga inahan sa tanang festival sa Pilipinas gumikan sa pagkainila ug pagkadako niini.

Apan bisan pa man sa paningkamot sa lokal nga kagamhanan alang sa pagpahigayon sa hapsay nga Sinulog, aduna gihapoy makalusot nga lama sa kahapsay ug kalinaw sa maong kalihokan. Daghan ang nagtuo nga motumaw na usab ang kagubot atol sa maong kalihokan, ilabina niadtong gikalambigitan sa mga fraternity.

Sa niaging tuig, ang inilang duha ka magkaribal nga fraternity nagbinatuay atol sa parada sa Sinulog Grand Mardi Gras. Ug gikabalak-ang mosiaw na usab ang maong mga grupo atol sa kalihokan karon tungod sa ilang mga pagdinumtanay.

Gani, dugay nang adunay kayugot sa usa'g usa ang maong duha ka grupo. Ang ilang bayolente'ng panagribal miabot na sa punto nga halos matag semana ang pagpinatyanay sa ilang isig sa sakop.

Dako gayud ang papel nga gihuptan sa kapolisan pagmintenar sa kahusay ug kanilaw sa labing dakong relihiyoso'ng katiguman sa atong dakbayan. Ang kaluwasan sa katawha'ng manambong sa Sinulog karon gikan sa bisan unsa mang krimen anaa sa mga kamot sa otoridad nga gipakatap sa mga kadalanan.

Hinuon dili malikayan ang pagtumaw sa mga nagkadaiya nga krimen taliwala niining mga dagkong kalihokan sama sa Sinulog. Kini gumikan usab sa pagsiaw sa mga kriminal kinsa buot mogamit sa panahon aron pagbiktima sa mga dumoduong.

Gani usa ka dakong kaulawan alang sa lokal nga kagamhanan nga bisan pa sa ilang paningkamot paghakot og mga bisita, langyaw man o lokal, ania gihapoy mga dautang elemento nga buot molama sa maayo niining mga tinguha.

Sa niaging mga adlaw, usa ka American national ang gikawatan sa iyang salapi sulod sa iyang giabangang kuwarto sa usa ka hotel sa downtown area. Apan gituohan sa kapolisan nga ang maong pagpangawat usa ka inside job tungod kay mora'g nasinati sa kawatan ang maong lawak.

Ang maong langyaw mianhi sa Sugbu gikan sa Florida sa Estados Unidos aron lamang pagsaksi sa Sinulog. Apan wala siyay suwerte tungod kay nabiktima na hinuon siya sa kawatan kinsa misurekbot sa iyang $6,500 sulod sa iyang giabangang kuwarto samtang duna siyay gipalit gawas sa hotel.

Kon ingon niini ang mga panghitabo atol sa mga dagkong kalihokan sa Sugbu, kinsa pa man unyay turista, langyaw man o lokal, ang moduaw dinhi? Sayang lamang ang paningkamot sa kagamhanan pagpakusog sa lokal nga turismo kon kulang usab ang pagpakusog sa otoridad sa ilang paningkamot sa kahusay ug kalinaw sa dakbayan.

Ang Sinulog maoy labing dakong kalihokan sa dakbayan nga mohakot og liboan ka mga turista sulod ug gawas sa Pilipinas. Ug angay lamang ipakita usab sa lokal nga otoridad nga aduna silay kapabilidad pagprotehir sa mga bisita gikan sa mga kriminal.

* * *

(Ipadala inyong reaksiyon sa [email protected])