Holdaper ng stude, timbog
MANILA, Philippines — Kalaboso ang isang holdaper makaraang makorner ng isang pulis na agad na rumesponde sa paghingi ng saklolo ng high school student sa Tondo, Maynila kahapon ng umaga.
Positibong itinuro ng 15-anyos na biktima ang suspek na si Brando Veneracion, 30, ng Tambunting, Sta. Cruz, Maynila, na siyang nangholdap at tumangay sa kaniyang cellular phone.
Sa ulat ng Manila Police District-Special Operations Unit, naglalakad mag-isa ang biktima papasok sa kaniyang paaralan at pagsapit sa kanto ng Rizal Avenue at Abad Santos St., sa Tondo ay biglang sumulpot ang suspek at tinutukan siya ng baril.
Tinangay ng suspek ang kaniyang gamit na cellular phone na nagkakahalaga ng P5,000 at mabilis na tumakas. Nagsisigaw ng saklolo ang dalagita at nakuha ang atensyon ng pulisya.
Nakorner ng pulis ang suspek sa tulong na rin ng taumbayan at narekober ang cellphone ng dalagita.
Nakaditine ngayon sa MPD-DSOU custodial jail ang suspek na nahaharp sa kasong Robbery Holdup sa Manila City prosecutors office.
- Latest
