Ang masakiton kong higala

Mihunong ang Isuzu Crosswind nga puti tungod sa gilingkoran ni Ricboy. "Uy! Si Royet man diay ning nanaog," matud ni Ricboy.

 "Kumosta ka, Ricboy?" timbaya ni Royet human makakanaug gikan sa Crosswind. "Wa ka man gyud mausab, young boy ka man lang gihapon."

"Nia, buhi pa gihapon bisan usahay walay maayong kaon. Di pareho nimo, pa Crosswind-Crosswind na lang," ingon sa may pagmahay ang tingog ni Ricboy nga midawat sa kamot ni Royet ug naglamano sila. "Lingkod, Roy. Hapit wa ko kaila nimo da kay mihugo ka kaayo."

"Nagpa-reduce ko, Ric kay maoy sugo sa doktor. Daghan ko og sakit, may dayabitis ko, ulcer, prostit, hiblad. Mora ko' nag-koleksiyon sa mga sakit sa mga dato."

"Aw, ingon gyud niana ang mga dato, Ric, kay may ikapa-doktor man, pareho nimo. Pero kaming mga pobre, igo na lang sa pag-inom og gabon."

"Pero, Ricboy, kun mahitabo, mosugot ka ba nga ilis ta?"

"Unsay buot mong ipasabot, Roy?"

Nga imo na ang akong Crosswind hasta ang akong mga sakit, ug ako na usab ang way sakit, sugot ka?"

"Ah! Di ko mosugot, Roy, mas pili-on ko nga pobre ug ingon niini bisan walay Crosswind."

"Kita mo na, di ka mosugot nga baylo ta, imo ang Crosswind ug ang akong mga sakit. "Nganong nia man diay ka?"

"Magpamisa man god ko alang sa akong ig-agaw nga dakong masakiton aron kaluy-an sa mahal nga patron kay duha ka tuig na siyang masakiton."

"Maayo ka gani, Ricboy kay bisan mo-sitenta ka na, mora og singkuwenta ka lang. Ako hinuon nga manghud pa nimo og pito ka tuig, mora na'g otsinta. Unsa bay imong sekreto, Ricboy?"

"Simple lang, Roy, di ko maghunahuna nga tiguwang na ko."

"Unsay buot nimong ipasabot?"

"You think old, dress old, you act old, you feel old, so, you look old," nagkatawa nga namulong si Ricboy sa iyang ininglis nga binayabas.

"Mao ra nay imong sekreto?"

"Oo, buhata na, basin may panahon ka pa. Sige, Roy, kay ari pa ko sa simbahan," dayong lakaw ni Ricboy. (Katapusan)