Suki sa online loan
Dear Tito Miguel,
Maayong adlaw kanimo, ug sa tanan nimong readers .
Tawga lang ko sa ngalan nga Jamaica .
Tito Miguel , adik na kaayo ko sa online loan applications. Sa sinugdan, gamay ra unta akong gihulam kay kulang akong kwarta alang sa akong mga personal nga panginahanglan. Nakaingon ko nga dali ra man diay manghulam online, walay daghang pangutana ug dali ra maaprubahan. Apan wala ko magdahom nga mahimong bisyo na hinuon kini.
Matag mahurot akong kwarta, mangita na pud kog laing loan application. Usahay, mangutang ko sa usa ka app aron lang makabayad sa akong utang sa laing app. Tungod niini , nalisang na hinoun ko kung asa magsugod og bayad tungod kay nagkadaghan na ang akong mga utang ug interes. Ang akong problema, dili na lang kwarta ang akong nawala. Apil na ang akong kalinaw sa hunahuna. Kada naay mosulod nga text o tawag, mahadlok ko basin kolektor na pud. Usahay, dili na ko katulog kay sige kog hunahuna kung unsaon nako pagbayad. Kada makadawat ko’g sweldo, imbes nga makatigom, diretso na hinuon sa pagbayad sa mga utang. Unya mangutang na pud ko kung mahutdan.
Unsaon nako pagbuhi sa akong kaugalingon gikan niining bisyo sa online lending? Aduna pa ba koy paglaom nga makabangon bisan daghan na kaayo ko’g utang? —Jamaica
* * *
Jamaica,
Usa ra’y solusyon sa imong problema. Ayaw na’g pangutang bahala’g paninglan na ka sa imong giutangan. Likayi ang gitawag nga debt trap, mangutang aron ikabayad sa laing utang. Kun dili ka mohunong, ang imong pagpangutang wala na’y kataposan hangtod malumos ka.
Kun dili na nimo maapas pagbayad, hinay-hinayi lang taman sa makaya sa imong budget. Kun paninglan ka’g mga kolektor ug mahadlok ka ka’y kusog raba manghulga ug magpakauwaw nimo, balibad lang sa tarong, ayaw’g tago. Kun pakauwawan o hulgaon ka, dangop sa otoridad. Kay dili igong rason ang dili pagbayad sa utang nga ikaw pakauwawan labi na gyud sa social media. Cyberlibel ang tawag niana. Konsulta’g abugado aron sigurado.
Kun sa imong tan-aw dili na gyud madala, kinahanglan na gyud mangutang gyud ka, ayaw sa online loan, kaonon ra ka sa mga loan shark o buaya. Ngadto dangop sa imong pamilya o suod nga higala. Kumpisal sa imong problema, hangyoa nga pahuwamon ka wala’y interest ug dili mabayran sa dali nga panahon. Apan klaroha kanus-a, duha o tulo ka tuig ba gikan karon o ini’g ka-impas sa tanan nimong utang. Kay kun mangutang na sad ka online, igo ra ka kan-on sa interest pa lang daan. Usba sab imong lifestyle, pagpuasa sa mga butang o laag nga dili kinahanglan. Antos ug sakripisyo, ka’y imong problema tungod ra man sad sa imong bisyo. —Tito Miguel
Magpatambag ka? Ipadala kang Tito Miguel: 0991-318-9366
- Latest
















