Istrikto nga uyab

Dear Tito Miguel,

Maayong adlaw, Tito Miguel. Ako si Asia, ug gusto unta ko mangayo og tambag bahin sa akong boyfriend nga si Richmond. Siyam ka bulan na ang among relasyon , ug sa una, abi nako nga sweet, caring ug protective ra siya. Pero pag-abot sa among ikasiyam nga bulan, mas klaro na nako ang iyang tinuod nga batasan.

Sobra ka-strikto si Richmond sa halos tanang aspeto sa among relasyon. Gusto niya siya ang magbuot kung asa ko moadto, kinsa akong kauban, kinsa akong istoryahan, ug usahay bisan sa gagmayng butang, kinahanglan mosunod ko sa iyang gusto. Kung dili ko mosunod, dali siyang masuko o magpakita og lain nga batasan. Sa una, akong gihuna-huna  nga tungod lang kini kay importante ko niya ug gusto lang siya nga protektahan ko. Pero karon, usahay mobati ko nga murag wala na koy kaugalingong kagawasan.

Tito Miguel, normal ba nga mahimong ingon ani ka-strikto ang usa ka boyfriend? Kinahanglan ba nga mosunod ko pirmi sa iyang mga gusto? Imbes nga mas malinawon ang among relasyon, mas nakita nako ang iyang tinuod nga batasan . — Asia

* * *

Asia,

Control freak imong uyab. Para niya normal ug natural ra na, mao man iyang pagkatawo. Wala unta’y problema kun ganahan ka sa feeling nga kontrolado ka’g gipanag-iya. Pero kay natuok na man ka, angay na ka mobalibad ug mosukol kun kinahanglan. Isulti imong gibati. Pero pag-una sa positive. Ingna na-appreciate nimo iyang pagka protective, pero nasobrahan ra. Pangayo’g kausaban, kay kun dili wala moy padulngan. Dili siya makabuot kun asa ka moadto ug kinsa imong kauban basta imo sab ipasalig nga wala kay buhaton nga dautan. Kun pananglit manglaag mo sa imong barkada

, igo na nga makahibalo siya asa mo ug unsa oras mouli. Dili kay kinahanglan pa iyang pagtugot. Pero isip respeto, magpahibalo gihapon ka.

Kun diskumpyado siya, pakuyoga. Pero kun pananglit girl’s night out, o lakaw sa eskuylahan o opisina ba kaha o sa imong pamilya, kinahanglan siya mo-distansiya. Dagko na mo nagkita, uyab pa lang mo, dili kasado, wala siya’y katungod magbuot unsaon nimo pagpadagan sa imong kinabuhi. Kun iya pakialaman ang tanan, mora na ka niya’g gitangtangan sa kabuot.

Kun dili maminaw, magduda pa nuon nga duna na kay lain, dili gyud na mag-usab. Para niya walay angay usbon kay sakto man siya. Kun mag-usab, ayaw dayo’g salig, lagmit sa primero ra na, kadugayan mogawas gihapon ang natural.Kun dili na ka kumportable ug malipayon, angay na ka magduha-duha. Uyab pa gani mo wa na kay kagawasan, unsa na lang kaha kun kasado na mo, sigurado ikaw ikandado. Tito Miguel

Magpatambag ka? Ipada kang Tito Miguel:  0991-318-9366