Ang managhigala

“Oy! Fermin! Kanus-a ka pa dinhi?” mitimbaya ang iyang higala nga si Padre Roman.

“Di pa lang dugay, Padre. Ikaw?”

“Pareho ta, di pa lang sab dugay.”

“Maayo hinuon nga nagkakuyog ta Padre kay tingali’g malakas ka kang Nyor Pedro.”

“Sige lang, ikaw lay una, magsunod ko nimo, kay kun unsay imong problema, ako nay mohangyo ni Nyor Pedro,” mipasalig ang Pari. “O, nia na ta sa gate, sige, ikay una.”

“Unsay imong ngan?” nangutana si Nyor Pedro.

“Fermin, Nyor. Fermin Palaubsanon.”

“Unsay trabaho?”

“Driver lang ko, Nyor.”

Gikonsulta dayon ni Nyor Pedro ang iyang kumputer.

“Okey ka, accepted, dawata ni.” Gitunol ni Nyor Pedro ang tsaliko nga may mga diamond ug 18 karats nga gold ang sidsid niini. “Isul-ob ni kanunay samtang nia ka sa langit. Next!”

Miduol si Padre Roman. “Akoy sunod, Nyor.”

“Unsay ngan?”

“Roman Algarme, Nyor.”

“Unsay trabaho?”

“Pari, Nyor.”

Gikonsulta dayon ni Nyor Pedro ang iyang komputer.

“Okey ka. O, dawata ni, ug isul-ob ni kanunay samtang nia ka sa langit,” gitunol ang tsaliko nga maong nga walay bisan unsang dekorasyon nga diamond o gold.

“Nyor, nganong ordinaryong maong man lang ning akong tsaliko nga wa may diamond ug gold samtang kang Fermin may mga diamond?”

“Dinhi sa langit,” mipatin-aw si Nyor Pedro, “ang importante namo mao ang resulta sa inyong trabaho. Kun mag-misa ka, makatulog ang mga tawo sanglit boring kang mosulti. Samtang kun makasakay ang mga tawo sa jeepney nga gimaneho sa driver, nag-ampo ug nag-rosaryo pa ang uban kay nahadlok nga maaksidente kay kusog ra ba kaayo mopadagan si Fermin.”

“Unya, Nyor, makapamalikas man gani nang mga pasahero kay kusog kaayong mopadagan si Fermin.”

“Aw! Sala na sa mga pasahero kana kay nganong namalikas sila. Next!” (Katapusan)