Boarding house

Si Amelia lang ang nahabilin sa gipuy-an niyang boarding house sa P. del Rosario. Sayo pa ang kabuntagon, ug wa pa mobangon si Amelia sa higdaanan niyang double deck. Samtang ang kauban niya sa boarding house tua na sa tagsa-tagsa ka unibersidad, naghigda-higda pa siya. Alas nuybe pa ang iyang klase.

Duha ka lawak ang maong boarding house. Ang usa ka kuwarto, pulos sila babaye ang nagpuyo. Ug ang usa ka lawak pulos sab mga lalake. Managsama silang tanan, mga estudyante ug naggikan sa lagyong mga lungsod sa Sugbu.

Sa silong nagpuyo ang tag-iya sa boarding house. Ug silang mga boarders sa taas nagpuyo. Unya naigking si Amelia dihang may tingog siyang nadungog nga nangayog katahoran. Apan wa siya mokihol. Maoy iyang gituhoan nga ang tag-iya sa boarding house maoy moatubang sa bag-ong nahiabot nga bisita. Apan nagpadayon pagpangayog katahoran ang tawo nga usa ka lalaki. Migawas siya sa lawak ug mikanaog. Dinhi pa niya masayri nga serado diay ang pultahan sa silong. Lagmit nanglakaw ang tag-iya nga way anak.

“Unsay ato, Sir?” Nag-sir si Amelia agi’g pagpakita sa maayong pamatasan.

“May nagsulti nako nga nanawat og boarders dinhi bisa’g lalake.”

“Ay, oo, uy.” Mitutok si Amelia sa lalaki. Guwapo kini, husto ang barog ug parehas niya’g edad.

“May bakante pa ba? Estudyante ko. Mopahawa ko sa akong gipuy-an kay gub-on na man kini sa tag-iya.”

“Duna. Nagpaulian na man god ang usa ka boarder nga lalaki matag gabii kay sa Carmen ra man siya nagpuyo, ug graduating na sab.”

Nakapuyo gyud ang lalaki sa boarding house nga gipuy-an ni Amelia. Nagkaila na sab sila. Gerald ang ngalan niini ug nagkuha’g Engineering sa USC.

Usa ka hapon, giduol ni Amelia si Gerald   nga nag-inusara sa terrace sa boarding house.

“Kining, Gerald, ayaw lang lainag sabot, ha? One week ka na uban namo dinhi, apan namatikdan tika nga kanunay naghinuktok.”

Miginhawag lawom si Gerald. Nakaduko si Amelia kay gitutokan siya pag-ayo sa ulitawo.

“Wa ko makasabot, Mel, kun unsay deperensiya nako. Frankly, upat na ka babaye ang akong gipangulitawhan, apan pulos kapakyasan ang akong naangkon.”

Hisabtan na ni Amelia kun nganong kanunay nagmasulob-on si Gerald. Naluoy siya sa ulitawo. Busa, iya kining gisultihan sa diha sa iyang hunahuna.

“Kun physical, Gerald, di ka lisod mahalon. Guwapo ka, attractive ang imong hitsura. Naatol lang tingali nga di nimo suwerte ang maong mga babaye. Sa pagka-tinuod, sultihan tika nga daghan na ang mga nangulitawo nako, apan wa koy gisugot kay wa ko man sila higugmaa.”

Sa pagpanglabay sa mga adlaw, nagkasuod pag-ayo si Amelia ug Gerald. Kanunay silang magsultihanay sa terasa sa boarding house. Ang boarding house maoy saksi sa ilang panagsuod.

“Basig kitang duha ang gitakdo sa kapalaran, Mel.”

Nakita ni Amelia nga seryuso kaayo si Gerald. Nakaduko siya sa tinan-awan niini kaniya.

“Kay ngano man diay, Rald?” Mipasiplat si Amelia sa ulitawo.

“Nasuta ko nga gihigugma tika, Mel.”

Hilom sab nga gimahal ni Amelia si Gerald. Busa, wa niya kini paantosa’g dugay. Iyang gisugot ang ulitawo. Ug ang boarding house kanunay nakasaksi sa ilang maduloton nga pagminahalay. -- Kataposan