Ang hamok

Nagabhian akong nagtumod sa akong kopras sa merkado sa Ka Goyong ug labi pa akong nalangan kay dunay napiang nga nagpahilot nako. Alas nuybe na sa relo kong baratohon sa pagtungas ko sa bukid sa Biasong.

Pag-abot nako sa ibabaw sa Biasong tungang gabii na apan hayag kaayo ang bulan. Nakita ko ang parola sa Tabogon nga mosiga ug unya moawop. Nagpadayon ako sa paglugsong agi sa lugot sa bungtod paingon sa Tabunan diin mahimutang ang gamay kong payag. Kalit lang dihay misakdap sa akong ulo nga usa ka langgam ug unya mikatawa kini sama sa kinataw-an sa usa ka babayeng buang.

“Hah-hah-hah-hah,” milanog sa kagabhion ang katawa.

Sa akong paghangad nakita ko ang langgam nga natungod sa bulan. Dako kaayo kini, mas dako pa kay sa uwak ug siga kaayo ang mga mata niini. Mibalik siya aron sa pagsakdap na usab nako. Nangandam na ako sa dala kong bahi sa buli ug sa iyang pagduol, gilapdosan ko kini sa bahi. Naigo kini ug nahulog nga nagkapa-kapa sa yuta.

“Ayaw siyag patya, Dong, kay ako siyang binuhi.”

Nahalingi ako sa akong likod ug didto nagtindog ang usa ka babayeng maanyag ug maputi.

“Igo ka lang niyang gihagwa ug gikomedyahan apan imo siyang gitinuod,” padayon sa babaye nga mipunit sa langgam.

“Gikomedyahan niining orasa sa kagabhion? Kun ungo ka sa inyo, ayaw pag-inungo nako kay dili tika ayran.”

Milakaw ang babaye palayo nako nga walay tingog nga nag-hapohap sa langgam. Pag-abot nako sa unahan, natumba ug miali nako ang usa ka buos nga kawayan. Akong giibot ang akong sundang ug giputol ang kawayan aron mahawan ang akong agian. Nagpadayon ako sa paglakaw subay sa lugot. Sa unahan may nakita akong duha ka kalayo nga ingon ka dagko sa lubi ang nagsabong.

Inig-labok nila nga sama sa duha ka manok nga nagsabong, mangadugmok sila sa lainlaing kolor ug motibuok pag-abot sa itaas ug maglabok na usab. Sa akong pag-agi, diri na gayud sa akong atubangan sila nagsabong ingon sa gusto nila akong alihan.

Sa akong kapikal, ako silang gisinggitan.

“Oy – mga Satanas, sa ngalan ni Kristo, pamahawa mo!”

Kalit lang nangawagtang ang kalayo. Nakaabot ako sa Tabunan og mga alas kuatro sa kaadlawon nga wala nay mihamok kanako. (Katapusan)