Dennis exclusively Kapuso na

Walay kabutangan sa kalipay si Dennis Trillo sanglit sa katapusan exclusive star na siya sa Kapuso network. Matud ni Dennis lahi ang iyang gibati nga kalipay sanglit feeling niya hingpit na siya nga gidawat sa GMA-7 ug secured na siya.

Taod-taod na nga nakita si Dennis sa mga shows sa GMA-7 apan per project lang ang kontrata niya kaniadto. Apan matud pa ni Dennis swerte siya tungod kay puros nindot ang mga proyekto nga gihatag sa network ngadto kaniya.

Midugang si Dennis nga swerte siya tungod kay tibuok ang pagsalig sa GMA-7 sa iyang talento ug kanunay siya nga gisuportahan.

Hinungdan nga sa presscon sa Super Twins ning bag-o lang ganado siya nga nituki sa iyang role sa maong TV show, diin bida pod sila si Nadine Samonte ug Jennylyn Mercado.

Una nang nabalita dinhi sa Banat Hugyaw nga bida kontrabida ang role ni Dennis. Ug matud pa niya mas gipangandaman niya og maayo ang maong role, diin kinasingkasing niya nga gisag-o ang iyang mga linya aron dili na kinahanglan nga hunahunaon unsay iyang buhaton, hinunua mas natural ang acting nga mogawas.

Ang Super Twins magsugod na ugma sa gabii isip hulip sa Atlantika.