Standhardinger darating sa Biyernes

MANILA, Philippines — Napaaga ang pagbabalik ni Christian Standhardinger sa Pilipinas para kaagad maglaro sa San Miguel sa darating na 2018 PBA Commissioner’s Cup.

Ito ay dahil sa pagsibak ng San Miguel-Alab Pilipinas sa Hong Kong Eastern Lions sa semifinals series ng 2018 Asean Basketball League.

Nakatakdang dumating sa bansa si Standhardinger sa Biyernes at inaasahang kaagad sasama sa ensayo ng mga Beermen, ayon kay head coach Leo Austria.

Sa pagbubukas ng 2018 PBA Commissio­ner’s Cup sa Abril 22 sa Smart Araneta Coliseum ay magtutuos ang Blackwater at Columbian Dyip (Kia Picanto) sa unang laro sa alas-4:30 ng hapon kasunod ang salpukan ng TNT KaTropa at Globalport sa alas-6:30 ng gabi.

Hindi naman masisilayan ang San Miguel at Magnolia, naglaban sa katatapos na 2018 PBA Philippine Cup Finals sa unang linggo ng komperensya.

Mula sa kanyang ave­rage na 30 points per game para sa Hong Kong team ay nalimitahan si Standhardinger nina SMB-Alab imports Renaldo Balkman at Justin Brownlee sa kanilang semis series.

Naniniwala si Austria na kaya ng 6-foot-8 Fil-German player na maglaro sa small forward, big forward at center spots.

“He’s an agile big man and he would give us much flexibility,” sabi ni Austria kay Standhardinger.

Sa kanyang paglalaro sa No. 3 position ay makakasabayan ni Standhardinger sina Arwind Santos at June Mar Fajardo.

Ibabandera rin ng San Miguel si import Troy Gillenwater na may magandang perimeter shooting.

Nilinaw ni Austria na maaari pa rin niyang tapikin sina Charles Rhodes at Balkman kung hindi maganda ang ipapakita ni Gillenwater para sa Beermen.