Mga barangay paandamon

CEBU, Philippines — Giduso nila ni Konsehal Dave Tumulak ug Konsehal Jun Alcover ang Community Action Response to Emergency (CARE) and Calamity Ordinance of Cebu City nga nagtumong sa matag barangay nga mahimong andam ug makatubag dayun sa mga emerhensiya ilabi na sa unang mga oras human sa kusog nga linog o dakong katalagman nga mahimong makabalda sa kuryente, suplay sa tubig, mga dalan ug komunikasyon. Usa sa nakapaaghat sa duha ka konsehal nga iduso ang ordinansahon mao ang pagtumaw sa kabalaka sa mga dili matagna nga mga katalagman nga nasinati o masinati pa sa Sugbo sama sa linog, kusog nga pag-uwan ug uban pang katalagman nga kinahanglan og dinaliang tabang. Ubos sa maong ordinansahon, ang barangay ang mauna sa pagpahigayon og disaster response samtang ang mga opisyal sa siyudad mosunod sa pagtabang kung dili na igo ang kapasidad sa barangay sa pag-atiman sa sitwasyon. Ang matag barangay kinahanglan nga magkuha og mga volunteer ug magmugna og emergency response teams ug ipaubos pagbansay-bansay aron adunay igong kaalam sa pagtubag og emerhensiya.

Gikinahanglan nga adunay lima ka trained responders nga mahimong langkuban sa usa ka medical professional, enhinyero o ba kaha panday, tubero, electrician ug mekaniko nga makatabang sa nagkadaiyang panginahanglan panahon sa emerhensiya.

Lakip sa kinahanglan andamon ang magpahigayon og disaster drill ug andamon ang bakwitanan. Kinahanglan nga palig-unon ang early warning systems lakip ang river monitoring equipment, sirens ug public address systems nga konektado sa disaster response network sa siyudad. Kinahananglan nga andam na sab ang rescue vehicles, communications equipment, medical supplies, water purification systems, life-saving equipment ug uban pang kahimanan alang sa pagtubag sa emerhensiya.

Nalakip sa ordinansahon ang “Know Your Constituents” (KYC) system aron adunay pinakaulahing impormasyon ang barangay bahin sa ilang mga residente lakip na ang paghimo og listahan sa mga residente nga mas delikado ang kahimtang panahon sa kalamidad, lakip ang mga pagtala sa mga panimalay nga adunay tiguwang, persons with disabilities (PWD) ug mga tawo nga adunay medikal o espesyal nga panginahanglan.

Sa pagkakaron, ipaubos pa og lehislatibong proseso ang ordinansahon sa dili pa kini mahimong hingpit nga balaod. — /IBM (FREEMAN)