Iba pang produkto maaaring apektado din ng 'Mad Cow'

Nagbabala kahapon si Dr. Romy Quijano ng Department of Pharmacology and Toxicology ng University of the Philippines na hindi lang mga karne ng baka ang maaaring maapektuhan ng mad cow disease.

Sinabi ni Quijano na maaari rin anyang makontamina nito ang mga pagkaing ginagamitan ng taba ng baka tulad ng butter, mantika, gelatin, cake at gamot bagaman naunang nilinaw ni Agriculture Secretary Leonardo Montemayor na hindi apektado ng mad cow ang gatas at iba pang pasteurized products bukod sa mga imported na karne ng baka lang ang apektado rito.

Sinabi pa ni Quijano sa isang forum na dapat bumuo ang pamahalaan ng isang task force na mag-aaral kung paano maiiwasan ang mad cow. (Ulat nina Grace Amargo at Angie dela Cruz)