Gahi o Gabon

Wala pa gani makalingkod sa trono sila si Cebu City mayor-elect Edgardo Labella ug vice mayor-elect Mike Rama ug ang partido nilang Barug PDP Laban, gisuwayan ug gihagit na dayon sila kun makabarug ba o makalaban ba sa mga dagko nga suliran.

Dinhi unya nato masukod unsa ka gahi ug unsa ka gabok ang liderato sa duha ka taas nga opisyal sa dakbayan sa Sugbo.

Nag una sa dakong suliran sa liderato ni Labella ug Rama ang gidaghanon sa ilang numero sa konseho nga gilangkoban sa mga sakop sa Bando Osmeña Pundok Kausaban (BOPK) nga mga loyalista sa naparot nga si Mayor Tomas Osmeña.

Sigun sa talaan, sa 18 ka mga konsehal sa norte ug south, pito lamang niini ang mga sakop sa Barug PDP Laban busa lisod nga makalusot sa konseho ang mga proyekto ug programa nga nanginahanglan og pagtugot sa konseho gawas lang kun may milagro.   

Kining maong sitwasyon, nanginahanglan og mga pag-ampo nga unta dili magpadiktar sa pildero nga si Tomas Osmeña ang mayorya sa konseho.

Mao untay ipatigbabaw sa mayorya sa konseho ang panginahanglan sa katawhan ug dili ang panginahanglan sa ilang amo.

Pero sa ka loyal sa mayorya sa mga konsehal ngadto ni Osmeña, morag mamaga pa og maayo ang kobal sa tuhod ni Labella ug Rama sa paglinuhod atubangan sa Ginoo aron may milagro nga mahitabo sa konseho sa dakbayan sa Sugbo. Milagro nga maghatag na og pabor sa liderato ni Labella ug Rama.

Laing hagit sa bag-ong liderato mao ang mainit nga away nila ni Councilor Jun Alcover ug councilor-elect Nina Mabatid tungod sa pasangil nga “Junking.”

Gipasanginlan ni Alcover si Mabatid nga naniguro lang og iya sa pagpangampanya ug sa adlaw sa piniliay maong nangapildi sila nga mga kauban niya. Gihimakak ni Mabatid ang pasangil ni Alcover. 

Dinhi nato masukod unsa ka gahi o ka gabok ang liderato ni Labella ug Rama. Good luck.