Mga lodge ‘lili-on’ sa mga polis

CEBU, Philippines – Bantayan sa kapolisan sa Dakbayan sa Talisay ang mga lugar nga suroyan sa mga pamilya ug manag-uyab atol niining pagsaulog sa Valentine’s Day.

Matud ni Police Major Gerard Ace Pelare, hepe sa Talisay City Police Station, nga lakip niini ang pag-roving sa mga lodging houses.

“Pa-roving nato to prevent adultery, concubinage and other crimes,” matud ni Pelare.

Gipahimangnoan sab ni Pelare ang mga drayber nga dili mopahimulos sa higayon kay seguro gyud sila nga madakpan kung ireklamo.

Dress code

Si Talisay City Mayor Gerald Anthony “Samsam” Gullas Jr. nimando alang sa dress code karong adlawa sa mga kawani sa City Hall.

Kini aron mabulokon ang adlaw sa pagsabwag sa gibati sa usa ka tawo.

Sa memorandum sa mayor nagpasabot  nga “red-taken and in love, yellow-it’s complicated, orange-prisoner to someone’s love, green-single and ready to mingle, pink-me time, not yet ready, grey-the one that got away, black-manhid.”

Lakip sa motuman mao ang mga job order nga kawani ug ang Talisay City College human si Ritchel Bacaltos nisunod niini.

Apan gipasabot ni Gullas nga walay labot ang mga tinun-an sa high school ug elementary kinsa iyang gitambagan nga tarungon una ang ilang pagtungha aron malipay ang ginikanan.

Libre suroyan

Samtang bukas nga suroyan karong adlawa ang Cebu City Resource Management and Development Center (CREMDEC) nga nahimutang sa bukirang Barangay Taptap ubos sa pagdumala ni Dr. Alice Utlang.

Matud ni Utlang nga kadtong walay igong budget karong adlawa mahimo ra nila ikonsiderar ang CREMDEC nga usa sa ilang kasuroyan nga libre.

Adunay gipahimutang nga daku kaayo nga porma kasingkasing nga buwak nga mahimo nga makapahulagway ang managhigugmaay o pamilya ug aduna usab silay lugar nga mahimo sila maka-picnic.

Gidasig ni Utlang ang mga mobisita sa CREMDEC nga mahimo silang mananum og kahoy isip handumanan nga mahimo nilang balik-balikan.

Alang sa mga walay sakyanan, mahimo ra mosakay og habal-habal gikan sa Lahug ug magpahatud sila sa maong lugar.

Gugma sa dios

Sa laing bahin nidasig ang kadagkuan sa simbahan nga tan-awon ang tinuoray nga diwa sa gugma ug dili ang physical nga pagbati lang.

Matud ni Arsobispo Jose Palma nga ang Valentine’s Day nagpahinumdum kini sa gugma, mga pagtan-aw sa gugma nga dili lamang atraksyon, dili lamang pagbati o physical kung dili mas lawom nga gugma nga ang katuyoan para sa kaayohan sa tanan.

Sumala pa ni Palma nga ang tinuod nga gugma dili sayon tungod kay gigiyahan kini sa Dios ug mao usab kini ang solusyon sa daghan nga mga problema sama sa gugma ngadto sa mga ginikanan, higala ug lakip sa komunidad.

Ang Arsobispo nitug-an nga sama sa gipadayag ni Pope Benedict ang tinuod nga gugma manguha og kusog ug inspirasyon sa gugma gikan sa Dios.

Samtang si Auxiliary Bishop Midyphil Billones niawhag sa kabataan “to fall in love, renew” sa ilang gugma ngadto sa Ginoo.

Gitug-an ni Billones nga kung  mas mahigugma ang katawhan sa Ginoo, magiyahan usab ang kinabuhi sa tawo ug makaangkon usab sa iyang kalampusan diin magselebrar sila sa gugma nga puno sa kamaya ug kalinaw.

Malaumon si Billones nga uban sa pag-ampo nga ang Ginoo kanunay mahigugmaon sa iyang katawhan. Rowena D. Capistrano/GMR (BANAT NEWS)