Nibalibad sa tagay gitigbas

CEBU, Philippines — Gitigbas ug naangol ang usa ka lalaki human kini nibalibad og dawat sa tagay gikan sa mga nag-inom diha sa Barangay Can-ibuang, lungsod sa Catmon niadtong Domingo sa gabii.

Si Joseph Pontillas, 34, usa ka panday,  nakaangkon og samad sa likod human gitigbas sa habal-habal driver nga si Jhonny Molejon, 53.

Matud pa sa imbestigasyon sa Catmon Police Station, si Pontillas naagi sa tindahan diin nag-inom si Molejon kauban ang usa ka Elden Duran.

Si Duran nagsige og pamugos nga paimnon si Pontillas apan nagdumili kini sa pag-inom hinungdan nga sila nagkalalis.

Si Molejon nisuway og pakalma sa sitwasyon apan padayon ang panaglalis sa duha hinungdan nga nasuko kini ug gitigbas si Pontillas.

Si Pontillas gidala sa Juan Dosado Memorial Hospital samtang ang suspek boluntaryong nitahan sa kapolisan. (CNU Intern/IBM) (BANAT NEWS)